ᠬᠠᠷ᠎ᠠ ᠪᠠᠭᠠᠪᠠᠭᠠᠢ ᠶᠢᠨ ᠳᠠᠷᠢᠭᠰᠠᠨ ᠨᠢᠭᠦᠯ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2025/1/9
    ᠪᠡᠯᠳᠦ ᠵᠥᠭᠡᠢ ᠨᠦᠭᠦᠳ ᠶᠡᠭᠡ ᠯᠡ ᠠᠭᠤᠷᠯᠠᠵᠤ᠂ ᠠᠮᠢᠳᠠᠨ ᠤ ᠰᠢᠭᠦᠭᠴᠢ ᠨᠣᠶᠠᠨ ᠠᠷᠰᠯᠠᠨ ᠢ ᠡᠷᠢᠵᠦ ᠣᠴᠢᠭᠠᠳ ᠬᠦᠷᠡᠩ ᠪᠠᠭᠠᠪᠠᠭᠠᠢ ᠶᠢᠨ ᠪᠡᠯ ᠳᠡᠭᠡᠷᠡᠮᠳᠡᠵᠦ ᠢᠳᠡᠭᠰᠡᠨ ᠤᠴᠢᠷ ᠢ ᠵᠠᠭᠠᠯᠳᠤᠵᠠᠢ᠄     ︽ᠲᠠ ᠨᠠᠷ ᠲᠡᠭᠦᠨ ᠢ ᠬᠠᠳᠬᠤᠳᠠᠭ ᠦᠭᠡᠢ ᠶᠤᠮ ᠦᠦ︖︾ ᠭᠡᠬᠦ ᠳᠤ ᠪᠡᠯᠳᠦ ᠵᠥᠭᠡᠢ ᠨᠦᠭᠦᠳ᠄ ︽ᠤᠤᠯ ᠨᠢ ᠬᠠᠳᠬᠤᠭᠠᠳ ᠬᠥᠭᠡᠭᠡᠴᠢᠬᠡᠳᠡᠭ ᠪᠠᠶᠢᠭᠰᠠᠨ ᠶᠤᠮ᠃ ᠣᠳᠤ ᠪᠡᠶ᠎ᠡ ᠳᠡᠭᠡᠨ ᠬᠤᠶᠠᠭ ᠡᠮᠦᠰᠦᠭᠡᠳ ᠶᠠᠭᠠᠬᠢᠵᠤ ᠬᠠᠳᠬᠤᠯ᠎ᠠ ᠭᠡᠳ ᠲᠡᠶᠢᠯᠭᠦ ᠦᠭᠡᠢ ᠪᠣᠯᠴᠢᠬᠠᠯ᠎ᠠ᠃ ᠮᠠᠨ ᠤ ᠦᠷᠡᠭᠳᠡᠯ ᠰᠦᠢᠳᠦᠯ ᠴᠣ᠋ ᠶᠡᠭᠡ ᠪᠠᠶᠢᠨ᠎ᠠ ︾ ᠭᠡᠵᠦ ᠭᠤᠮᠣᠳᠠᠯ ᠲᠣᠭᠠᠴᠢᠬᠤ ᠳᠤ ᠠᠮᠢᠳᠠᠨ ᠤ ᠰᠢᠭᠦᠭᠴᠢ ᠠᠷᠰᠯᠠᠨ ᠬᠦᠷᠡᠩ ᠪᠠᠭᠠᠪᠠᠭᠠᠢ ᠶᠢ ᠳᠠᠭᠤᠳᠠᠵᠤ ᠢᠷᠡᠭᠦᠯᠦᠭᠡᠳ᠄     ︽ᠴᠢ ᠶᠠᠭᠠᠬᠢᠭᠠᠳ ᠪᠡᠯᠳᠦ ᠵᠥᠭᠡᠢ ᠶᠢᠨ ᠪᠡᠯ ᠢ ᠳᠡᠭᠡᠷᠡᠮᠳᠡᠵᠦ ᠢᠳᠡᠭᠡᠳ ᠪᠠᠶᠢᠳᠠᠭ ᠶᠤᠮ︖︾ ᠭᠡᠵᠦ ᠠᠰᠠᠭᠤᠬᠤ ᠳᠤ ᠬᠦᠷᠡᠩ ᠪᠠᠭᠠᠪᠠᠭᠠᠢ ᠣᠷᠣᠭᠤᠯ ᠢᠶᠠᠨ ᠳᠣᠯᠢᠶᠠᠵᠤ᠄     ︽ᠪᠢ ᠢᠳᠡᠬᠦ ᠳᠤᠷᠠᠲᠠᠢ︾ ᠭᠡᠪᠡ᠃     ︽ᠴᠢ ᠢᠳᠡᠬᠦ ᠦᠭᠡᠢ ᠪᠠᠶᠢᠵᠤ ᠪᠤᠯᠬᠤ ᠦᠭᠡᠢ ᠦᠦ︖︾ ᠭᠡᠵᠦ ᠠᠷᠰᠯᠠᠨ ᠥᠭᠦᠯᠡᠬᠦ ᠳᠤ ᠬᠦᠷᠡᠩ ᠪᠠᠭᠠᠪᠠᠭᠠᠢ ᠥᠭᠡᠳᠡ ᠠᠴᠠ ᠨᠢ᠄     ︽ᠲᠠ ᠤᠰᠤ ᠤᠤᠭᠤᠬᠤ ᠦᠭᠡᠢ ᠪᠠᠶᠢᠵᠤ ᠪᠣᠯᠣᠨ᠎ᠠ ᠦᠦ︖︾ ᠭᠡᠵᠦ ᠬᠠᠷᠢᠭᠤ ᠮᠣᠬᠤᠭᠠᠯ᠎ᠠ᠃ ᠠᠷᠰᠯᠠᠨ ᠲᠠᠭᠯᠠᠷᠠᠭᠠᠳ᠂ ᠬᠦᠷᠡᠩ ᠪᠠᠭᠠᠪᠠᠭᠠᠢ ᠶᠢ ᠲᠠᠯᠪᠢᠵᠤ ᠶᠠᠪᠤᠭᠤᠯᠪᠠ᠃ ᠠᠮᠲᠠᠰᠢᠭᠰᠠᠨ ᠬᠦᠷᠡᠩ ᠪᠠᠭᠠᠪᠠᠭᠠᠢ ᠵᠠᠮ ᠳᠠᠭᠠᠨ ᠪᠠᠰᠠ ᠪᠡᠯᠳᠦ ᠵᠥᠭᠡᠢ ᠶᠢᠨ ᠡᠭᠦᠷ ᠢ ᠲᠠᠭᠠᠷᠢᠵᠦ ᠪᠠᠯ ᠢ ᠨᠢ ᠪᠤᠯᠢᠶᠠᠵᠤ ᠳᠡᠭᠡᠷᠡᠮᠳᠡᠬᠦ ᠳᠡᠭᠡᠨ ᠡᠭᠦᠷᠯᠡᠭᠰᠡᠨ ᠮᠣᠳᠣ ᠶᠢ ᠨᠢ ᠴᠣ᠋ ᠤᠨᠠᠭᠠᠴᠢᠬᠠᠬᠤ ᠰᠢᠬᠠᠵᠠᠢ᠃ ᠠᠶᠤᠨ ᠪᠠᠵᠠᠭᠠᠳᠠᠬᠰᠠᠨ ᠪᠡᠯᠳᠦ ᠵᠥᠭᠡᠢ ᠨᠦᠭᠦᠳ ᠠᠮᠢᠳᠠᠨ ᠤ ᠰᠢᠭᠦᠭᠴᠢ ᠨᠣᠶᠠᠨ ᠠᠷᠰᠯᠠᠨ ᠢ ᠳᠠᠭᠢᠨ ᠡᠷᠢᠵᠦ ᠢᠷᠡᠭᠡᠳ᠄     ︽ᠣᠳᠤ ᠶᠠᠭᠠᠬᠢᠨ᠎ᠠ︖︾ ᠭᠡᠵᠦ ᠠᠷᠭ᠎ᠠ ᠠᠰᠠᠭᠤᠯ᠎ᠠ᠃     ᠠᠷᠰᠯᠠᠨ᠄ ︽ᠪᠠᠯ ᠢᠳᠡᠬᠦ ᠨᠢ ᠬᠦᠷᠡᠩ ᠪᠠᠭᠠᠪᠠᠭᠠᠢ ᠶᠢᠨ ᠪᠡᠶ᠎ᠡ ᠶᠢᠨ ᠬᠡᠷᠡᠭᠴᠡᠭᠡ ᠠᠴᠠ ᠪᠣᠯᠤᠭᠰᠠᠨ ᠤᠴᠢᠷ᠃ ᠢᠳᠡᠬᠦ ᠦᠭᠡᠢ ᠪᠣᠯ ᠪᠡᠶ᠎ᠡ ᠳᠤᠨᠢ ᠰᠢᠮ᠎ᠡ ᠲᠡᠵᠢᠭᠡᠯ ᠳᠤᠲᠠᠭᠳᠠᠭᠠᠳ ᠲᠣᠷᠣᠢ ᠪᠠᠭᠤᠷᠠᠢ ᠪᠣᠯᠣᠨ᠎ᠠ︾ ᠭᠡᠬᠦ ᠳᠤ᠄ ︽ᠲᠡᠭᠡᠯ᠎ᠡ ᠭᠡᠳ ᠪᠢᠳᠠᠨ ᠤ ᠶᠠᠭᠤᠮ᠎ᠠ ᠶᠢ ᠳᠡᠭᠡᠷᠡᠮᠳᠡᠵᠦ ᠪᠤᠯᠳᠠᠭ ᠶᠤᠮ ᠦᠦ︖ ᠭᠤᠶᠣᠯ᠎ᠠ ᠭᠡᠳ ᠦᠭᠡ ᠰᠣᠨᠣᠰᠬᠤ ᠦᠭᠡᠢ᠃ ᠵᠢᠭᠠᠬᠠᠨ ᠥᠭᠬᠦ ᠳᠤ ᠪᠠᠭ᠎ᠠ ᠪᠠᠶᠢᠨ᠎ᠠ ᠭᠡᠳ ᠶᠡᠭᠡ ᠠᠪᠤᠨ᠎ᠠ ᠭᠡᠨ᠎ᠡ᠃ ᠶᠡᠭᠡ ᠥᠭᠬᠦ ᠳᠤ ᠨᠠᠭᠠᠲᠠᠢ ᠨᠢ ᠬᠦᠷᠬᠦ ᠪᠠᠨ ᠪᠠᠶᠢᠴᠢᠬᠠᠬᠤ ᠶᠤᠮ᠃ ᠪᠢᠳᠠ ᠪᠠᠭᠠᠪᠠᠭᠠᠢ ᠶᠢ ᠲᠡᠵᠢᠭᠡᠬᠦ ᠠᠯᠪᠠ ᠦᠭᠡᠢ ᠰᠢᠣ ᠳ᠋ᠠ︾ ᠭᠡᠵᠦ ᠪᠡᠯᠳᠦ ᠵᠥᠭᠡᠢ ᠨᠦᠭᠦᠳ ᠬᠡᠯᠡᠬᠦ ᠳᠤ ᠠᠷᠰᠯᠠᠨ ᠭᠡᠨᠡᠳᠲᠡ ᠨᠢᠭᠡ ᠤᠴᠢᠷ ᠢ ᠪᠤᠳᠣᠨ ᠣᠯᠵᠤ᠄     ︽ᠲᠠ ᠨᠠᠷ ︿ᠤᠤᠯ ᠨᠢ ᠬᠠᠳᠬᠤᠭᠠᠳ ᠬᠥᠭᠡᠭᠡᠴᠢᠬᠡᠳᠡᠭ ᠪᠠᠶᠢᠭᠰᠠᠨ ᠶᠤᠮ᠃ ᠣᠳᠤ ᠪᠡᠶ᠎ᠡ ᠳᠡᠭᠡᠨ ᠬᠤᠶᠠᠭ ᠡᠮᠦᠰᠦᠭᠡᠳ ᠶᠠᠭᠠᠬᠢᠵᠤ ᠬᠠᠳᠬᠤᠯ᠎ᠠ ᠭᠡᠳ ᠲᠡᠶᠢᠯᠭᠦ ᠦᠭᠡᠢ ᠪᠣᠯᠴᠢᠬᠠᠯ᠎ᠠ﹀ ᠭᠡᠰᠡᠨ ᠴᠢᠨᠢ ᠶᠠᠮᠠᠷ ᠤᠬᠠᠭᠠᠨ ᠲᠠᠢ ᠦᠭᠡ ᠶᠤᠮ︖︾ ᠭᠡᠵᠦ ᠤᠬᠤᠴᠢᠯᠠᠨ ᠠᠰᠠᠭᠤᠬᠤ ᠳᠤ ᠠᠬᠠᠯᠠᠭᠴᠢ ᠪᠠᠯᠳᠦ ᠵᠥᠭᠡᠢ᠄     ︽ᠲᠡᠶᠢᠮᠦ᠂ ᠤᠤᠯ ᠨᠢ ᠬᠦᠷᠡᠩ ᠪᠠᠭᠠᠪᠠᠭᠠᠢ ᠳᠤ ᠬᠤᠶᠠᠭ ᠪᠠᠶᠢᠭᠰᠠᠨ ᠦᠭᠡᠢ᠂ ᠣᠳᠤ ᠬᠤᠶᠠᠭ ᠡᠮᠦᠰᠦᠭᠡᠳ ᠁︾ ᠭᠡᠵᠦ ᠥᠭᠦᠯᠡᠬᠦ ᠳᠤ᠄     ︽ᠡᠨᠡ ᠬᠤᠶᠠᠭ ᠢ ᠬᠠᠮᠢᠭ᠎ᠠ ᠠᠴᠠ ᠣᠯᠪᠠ︖︾ ᠭᠡᠵᠦ ᠠᠰᠠᠭᠤᠭᠰᠠᠨ ᠰᠢᠭᠦᠭᠴᠢ ᠨᠣᠶᠠᠨ ᠤ ᠨᠢᠳᠦ ᠭᠡᠷᠡᠯᠳᠦᠯ᠎ᠠ᠃ ᠠᠬᠠᠯᠠᠭᠴᠢ ᠪᠡᠯᠳᠦ ᠵᠥᠭᠡᠢ᠄ ︽ᠡᠭᠦᠨ ᠢ ᠁︾ ᠭᠡᠳ ᠨᠥᠬᠦᠳ ᠢᠶᠠᠨ ᠬᠠᠷᠠᠬᠤ ᠳᠤ᠄ ︽ᠪᠢ ᠮᠡᠳᠡᠨ᠎ᠡ᠂ ᠬᠠᠷ᠎ᠠ ᠪᠠᠭᠠᠪᠠᠭᠠᠢ ᠶᠢᠨ ᠬᠤᠶᠠᠭ ᠪᠠᠶᠢᠨ᠎ᠠ︾ ᠭᠡᠵᠦ ᠬᠠᠮᠤᠭ ᠤᠨ ᠪᠠᠭ᠎ᠠ ᠬᠠᠮᠠᠷ ᠤᠨ ᠦᠵᠦᠭᠦᠷ ᠪᠣᠯᠤᠭᠰᠠᠨ ᠵᠢᠵᠢᠭᠬᠡᠨ ᠪᠡᠯᠳᠦ ᠵᠥᠭᠡᠢ ᠵᠢᠩᠭᠢᠨᠡᠨ ᠳᠤᠤᠭᠠᠷᠤᠯ᠎ᠠ᠃     ︽ᠶᠠᠭ ᠮᠥᠨ ᠦᠦ︖︾ ᠭᠡᠵᠦ ᠰᠢᠭᠦᠭᠴᠢ ᠨᠣᠶᠠᠨ ᠪᠢᠴᠢᠬᠠᠨ ᠪᠡᠯᠳᠦ ᠵᠥᠭᠡᠢ ᠠᠴᠠ ᠲᠤᠯᠭᠠᠨ ᠠᠰᠠᠭᠤᠬᠤ ᠳᠤ᠄ ︽ᠮᠥᠨ᠂ ᠬᠠᠷ᠎ᠠ ᠪᠠᠭᠠᠪᠠᠭᠠᠢ ᠶᠢᠨ ᠡᠮᠦᠰᠦᠭᠡᠳ ᠶᠠᠪᠤᠵᠤ ᠪᠠᠶᠢᠬᠤ ᠶᠢ ᠪᠢ ᠣᠯᠠᠨ ᠤᠳᠠᠭ᠎ᠠ ᠬᠠᠷᠠᠭᠰᠠᠨ ᠶᠤᠮ᠃ ᠶᠠᠭ ᠮᠥᠨ︾ ᠭᠡᠵᠦ ᠪᠠᠲᠤᠲᠠᠢ ᠳᠤᠤᠭᠠᠷᠤᠯ᠎ᠠ᠃ ᠪᠠᠶᠠᠷᠯᠠᠭᠰᠠᠨ ᠰᠢᠭᠦᠭᠴᠢ ᠬᠠᠷ᠎ᠠ ᠪᠠᠭᠠᠪᠠᠭᠠᠢ ᠶᠢ ᠳᠠᠭᠤᠳᠠᠵᠤ ᠢᠷᠡᠭᠦᠯᠦᠭᠡᠳ᠄ ︽ᠴᠢ ᠶᠠᠭᠠᠬᠢᠭᠠᠳ ᠪᠡᠯᠳᠦ ᠵᠥᠭᠡᠢ ᠶᠢᠨ ᠪᠠᠯ ᠢ ᠳᠡᠭᠡᠷᠡᠮᠳᠡᠵᠦ ᠢᠳᠡᠳᠡᠭ ᠶᠤᠮ︖ ᠪᠢᠴᠢᠬᠠᠨ ᠠᠮᠢᠳᠠᠨ ᠢᠶᠠᠷ ᠡᠯᠡᠭ ᠪᠠᠷᠢᠵᠤ︾ ᠬᠡᠮᠡᠨ ᠳᠣᠩᠭᠤᠳᠬᠤ ᠳᠤ ᠲᠡᠭᠦᠨ ᠤ ᠨᠢᠳᠦ ᠣᠷᠣᠢ ᠳᠡᠭᠡᠷ᠎ᠡ ᠪᠠᠨ ᠭᠠᠷᠴᠤ᠄ ︽ᠨᠣᠶᠠᠨᠲᠠᠨ ᠮᠢᠨᠢ᠂ ᠪᠢ ᠲᠡᠶᠢᠮᠦ ᠬᠡᠷᠡᠭ ᠬᠢᠭᠰᠡᠨ ᠦᠭᠡᠢ᠃ ᠪᠢᠳᠠᠭᠤ ᠪᠠᠶᠢᠯ᠎ᠠ ᠭᠡᠳ ᠶᠠᠭᠠᠬᠢᠵᠤ ᠶᠠᠪᠤᠬᠤ ᠪᠠᠨ ᠪᠢ ᠮᠡᠳᠡᠨ᠎ᠡ᠃ ᠢᠲᠡᠭᠡᠬᠦ ᠦᠭᠡᠢ ᠪᠣᠯ ᠁︾ ᠭᠡᠳ ᠶᠠᠭᠤ ᠪᠠᠷ ᠪᠠᠲᠤᠯᠠᠬᠤ ᠪᠠᠨ ᠣᠯ ᠶᠠᠳᠠᠨ ᠨᠠᠭᠠᠰᠢ ᠴᠠᠭᠠᠰᠢ ᠬᠠᠷᠠᠪᠠ ᠃     ︽ᠡᠨᠡ ᠭᠡᠷ ᠲᠤ ᠴᠢᠮ᠎ᠠ ᠳᠤ ᠡᠵᠡᠨ ᠪᠤᠯᠬᠤ ᠶᠠᠭᠤᠮ᠎ᠠ ᠠᠯᠠᠭ᠎ᠠ︾ ᠭᠡᠰᠡᠨ ᠰᠢᠭᠦᠭᠴᠢ ᠠᠷᠰᠯᠠᠨ ᠬᠠᠷ᠎ᠠ ᠪᠠᠭᠠᠪᠠᠭᠠᠢ ᠶᠢ ᠡᠭᠴᠡ ᠬᠠᠷᠠᠵᠤ᠄     ︽ᠴᠢᠮ᠎ᠠ ᠳᠤ ᠪᠡᠯ ᠢᠳᠡᠭᠰᠡᠨ ᠤᠴᠢᠷ ᠪᠠᠶᠢᠨ᠎ᠠ ᠦᠦ︖︾ ᠭᠡᠪᠡ᠃     ︽ᠪᠠᠶᠢᠨ᠎ᠠ᠂ ᠭᠡᠪᠡᠴᠦ ᠪᠢ ᠪᠡᠯᠳᠦ ᠵᠥᠭᠡᠢ ᠠᠴᠠ ᠳᠡᠭᠡᠷᠡᠮᠳᠡᠵᠦ ᠠᠪᠤᠭᠰᠠᠨ ᠦᠭᠡᠢ︾ ᠭᠡᠵᠦ ᠬᠠᠷ᠎ᠠ ᠪᠠᠭᠠᠪᠠᠭᠠᠢ ᠣᠮᠤᠭ ᠲᠠᠢ ᠳᠤᠤᠭᠠᠷᠪᠠ᠃     ︽ᠭᠤᠶᠣᠵᠣ ᠠᠪᠤᠭᠰᠠᠨ ᠶᠤᠮ ᠦᠦ︖︾     ︽ᠦᠭᠡᠢ︾     ︽ᠪᠡᠯᠳᠦ ᠵᠥᠭᠡᠢ ᠬᠦᠷᠭᠡᠵᠦ ᠥᠭᠭᠦᠭᠰᠡᠨ ᠶᠤᠮ ᠦᠦ︖︾     ︽ᠦᠭᠡᠢ︾     ︽ᠡᠭᠦᠷ ᠠᠴᠠ ᠨᠢ ᠤᠨᠠᠵᠤ ᠢᠷᠡᠭᠰᠡᠨ ᠢ ᠴᠢ ᠲᠡᠭᠦᠵᠦ ᠢᠳᠡᠭᠰᠡᠨ ᠶᠤᠮ ᠦᠦ︖︾     ︽ᠦᠭᠡᠢ︾     ︽ᠣᠯᠣᠭᠠᠳ ᠠᠪᠤᠭᠰᠠᠨ ᠶᠤᠮ ᠦᠦ︖︾     ︽ᠦᠭᠡᠢ︾     ︽ᠬᠤᠳᠠᠯᠳᠤᠵᠤ ᠠᠪᠤᠭᠰᠠᠨ ᠶᠤᠮ ᠦᠦ︖︾     ︽ᠦᠭᠡᠢ︾     ︽ᠲᠡᠭᠡᠭᠡᠳ ᠴᠢ ᠶᠠᠭᠠᠬᠢᠭᠠᠳ ᠪᠠᠯ ᠣᠯᠵᠤ ᠢᠳᠡᠳᠡᠭ ᠶᠤᠮ︖︾ ᠭᠡᠵᠦ ᠰᠢᠭᠦᠭᠴᠢ ᠨᠣᠶᠠᠨ ᠭᠤᠷᠭᠤᠶᠢᠳᠠᠬᠤ ︵ᠤᠬᠤᠴᠢᠯᠠᠵᠤ ᠠᠰᠠᠭᠤᠬᠤ ᠭᠡᠰᠡᠨ ᠰᠠᠨᠠᠭ᠎ᠠ ᠲᠠᠢ ᠦᠭᠡ︶ ᠳᠤ ᠬᠠᠷ᠎ᠠ ᠪᠠᠭᠠᠪᠠᠭᠠᠢ ᠭᠠᠴᠢᠭᠳᠠᠬᠤ ᠳᠠᠭᠠᠨ᠄ ︽ᠬᠦᠷᠡᠩ ᠪᠠᠭᠠᠪᠠᠭᠠᠢ ᠨᠠᠳᠠ ᠳᠤ ᠥᠭᠭᠦᠭᠰᠡᠨ ᠶᠤᠮ︾ ᠭᠡᠵᠦ ᠠᠮᠠ ᠠᠯᠳᠠᠨ ᠬᠠᠷᠢᠭᠤᠯᠤᠭᠰᠠᠨ ᠢᠶᠠᠨ ᠭᠠᠳᠠᠭᠰᠢ ᠬᠠᠷᠠᠪᠠ᠃ ᠴᠣᠩᠬᠤ ᠪᠠᠷ ᠬᠦᠷᠡᠩ ᠪᠠᠭᠠᠪᠠᠭᠠᠢ ᠱᠠᠭᠠᠶᠢᠵᠤ ᠪᠠᠶᠢᠭ᠎ᠠ ᠴᠣ᠋ ᠶᠤᠮ ᠦᠦ︖ ᠭᠡᠵᠦ ᠪᠤᠳᠣᠬᠰᠠᠨ ᠴᠣ᠋ ᠪᠠᠶᠢᠵᠤ ᠮᠡᠳᠡᠨ᠎ᠡ ᠃     ᠰᠢᠭᠦᠭᠴᠢ ᠰᠢᠷᠡᠭᠡ ᠠᠯᠠᠭᠠᠳᠠᠨ ᠪᠤᠰᠬᠤ ᠳᠤ ᠬᠠᠷ᠎ᠠ ᠪᠠᠭᠠᠪᠠᠭᠠᠢ ᠴᠣ᠋ ᠣᠷᠣ ᠠᠴᠠ ᠪᠠᠨ ᠦᠰᠦᠷᠣᠨ ᠪᠣᠰᠣᠯ᠎ᠠ᠃     ︽ᠠᠷᠰᠯᠠᠨ ᠮᠢᠨᠢ᠂ ᠲᠠ ᠶᠠᠭᠠᠬᠢᠴᠢᠬᠠᠪᠠ︖ ᠪᠢ ᠬᠡᠷᠡᠭᠲᠡᠨ ᠪᠢᠰᠢ ᠰᠢᠣ ᠳ᠋ᠠ︾ ᠭᠡᠵᠦ ᠬᠠᠷ᠎ᠠ ᠪᠠᠭᠠᠪᠠᠭᠠᠢ ᠬᠥᠯᠥᠰᠦ ᠪᠠᠨ ᠠᠷᠴᠢᠨ ᠥᠭᠦᠯᠡᠬᠦ ᠳᠤ᠄ ︽ᠴᠢ ᠬᠦᠷᠡᠩ ᠪᠠᠭᠠᠪᠠᠭᠠᠢ ᠲᠠᠢ ᠠᠳᠠᠯᠢᠬᠠᠨ ᠳᠡᠭᠡᠷᠡᠮᠴᠢᠨ ᠪᠣᠯᠵᠠᠢ︾ ᠭᠡᠵᠦ ᠰᠢᠭᠦᠭᠴᠢ ᠨᠣᠶᠠᠨ ᠠᠭᠤᠷᠯᠠᠨ ᠬᠠᠰᠬᠢᠷᠤᠯ᠎ᠠ᠃ ᠬᠠᠷ᠎ᠠ ᠪᠠᠭᠠᠪᠠᠭᠠᠢ ᠤᠬᠠᠭᠠᠨ ᠲᠦᠭᠦᠭᠡ ᠶᠢ ᠨᠢ ᠣᠯ ᠶᠠᠳᠠᠨ ᠠᠯᠮᠠᠶᠢᠷᠠᠵᠤ᠄     ︽ᠨᠠᠮ᠎ᠠ ᠳᠤ ᠪᠠᠯᠳᠦ ᠵᠥᠭᠡᠢ ᠶᠢᠨ ᠪᠠᠯ ᠢ ᠳᠡᠭᠡᠷᠡᠮᠳᠡᠭᠰᠡᠨ ᠤᠴᠢᠷ ᠠᠯᠠᠭ᠎ᠠ︾ ᠭᠡᠵᠦ ᠰᠢᠭᠦᠭᠴᠢ ᠶᠢᠨ ᠥᠭᠡᠳᠡ ᠠᠴᠠ ᠵᠥᠷᠢᠪᠡ᠃     ︽ᠴᠢᠨᠦ ᠳᠡᠭᠡᠷᠡᠮᠴᠢᠨ ᠪᠣᠯᠣᠯ᠎ᠠ ᠭᠡᠰᠡᠨ ᠢ ᠬᠤᠶᠠᠷ ᠤᠴᠢᠷ ᠭᠡᠷᠡᠴᠢᠯᠡᠨ᠎ᠡ︾ ᠭᠡᠵᠦ ᠰᠢᠭᠦᠭᠴᠢ ᠨᠣᠶᠠᠨ ᠥᠴᠢᠬᠦ ᠳᠤ᠄ ︽ᠬᠤᠶᠠᠷ ᠤᠴᠢᠷ ᠭᠡᠷᠡᠴᠢᠯᠡᠨ᠎ᠡ ᠭᠡᠨ᠎ᠡ︖ ᠶᠠᠮᠠᠷ ᠬᠤᠶᠠᠷ ᠤᠴᠢᠷ︖︾ ᠭᠡᠵᠦ ᠬᠠᠷ᠎ᠠ ᠪᠠᠭᠠᠪᠠᠭᠠᠢ ᠲᠣᠯᠣᠭᠠᠢ ᠪᠠᠨ ᠮᠠᠭᠠᠵᠢᠨ ᠠᠰᠠᠭᠤᠬᠤ ᠳᠤ ᠰᠢᠭᠦᠭᠴᠢ ᠨᠣᠶᠠᠨ ᠲᠠᠶᠢᠪᠤᠰᠢᠷᠠᠨ᠄     ︽ᠬᠠᠶᠠᠭ᠎ᠠ ᠬᠠᠶᠠᠭ᠎ᠠ ᠪᠠᠨ ᠪᠠᠷᠠᠳᠠᠨ ᠰᠠᠭᠤᠭᠰᠠᠨ ᠬᠥᠷᠰᠢ ᠴᠢᠨᠢ ᠶᠠᠭᠤ ᠬᠢᠭᠡᠳ ᠶᠠᠪᠤᠳᠠᠭ ᠢ ᠮᠡᠳᠡᠨ᠎ᠡ ᠪᠢᠵᠡ︖︾ ᠭᠡᠬᠦ ᠳᠤ᠄     ︽ᠮᠡᠳᠡᠨ᠎ᠡ︾ ᠭᠡᠵᠦ ᠬᠠᠷ᠎ᠠ ᠪᠠᠭᠠᠪᠠᠭᠠᠢ ᠨᠣᠮᠣᠬᠠᠨ ᠳᠤᠤᠭᠠᠷᠤᠯ᠎ᠠ᠃     ︽ᠶᠠᠭᠤ ᠬᠢᠳᠡᠭ ᠶᠤᠮ︖︾     ︽ᠪᠠᠯ ᠳᠡᠭᠡᠷᠡᠮᠳᠡᠳᠡᠭ ᠶᠤᠮ᠃ ᠭᠡᠪᠡᠴᠦ ᠪᠢ ᠣᠷᠣᠯᠴᠠᠬᠰᠠᠨ ᠦᠭᠡᠢ︾ ᠭᠡᠵᠦ ᠬᠠᠷ᠎ᠠ ᠪᠠᠭᠠᠪᠠᠭᠠᠢ ᠪᠡᠶ᠎ᠡ ᠪᠠᠨ ᠴᠠᠭᠠᠳᠬᠠᠨ ᠥᠴᠢᠬᠦ ᠳᠤ᠄ ︽ᠴᠢ ᠣᠷᠣᠯᠴᠠᠬᠰᠠᠨ ᠦᠭᠡᠢ ᠭᠡᠨ᠎ᠡ︖ ᠪᠡᠶ᠎ᠡ ᠪᠠᠷ ᠢᠶᠠᠨ ᠣᠴᠢᠭᠰᠠᠨ ᠦᠭᠡᠢ ᠴᠣ᠋ ᠳᠠᠯᠳᠠᠭᠤᠷ ᠣᠷᠣᠯᠴᠠᠬᠰᠠᠨ ᠪᠠᠶᠢᠨ᠎ᠠ︾ ᠭᠡᠵᠦ ᠰᠢᠭᠦᠭᠴᠢ ᠨᠣᠶᠠᠨ ᠲᠣᠳᠣᠯᠠᠬᠤ ᠳᠤ᠄ ︽ᠨᠣᠶᠠᠨ ᠮᠢᠨᠢ᠂ ᠰᠠᠶᠢᠨ ᠬᠥᠮᠥᠨ ᠢ ᠭᠤᠮᠣᠳᠠᠭᠠᠬᠤ ᠪᠠᠨ ᠪᠣᠯᠢᠶ᠎ᠠ ᠭᠦ᠋᠃ ᠪᠢ ᠶᠠᠭ ᠣᠷᠣᠯᠴᠠᠬᠰᠠᠨ ᠦᠭᠡᠢ᠃ ᠲᠡᠭᠷᠢ ᠶᠢ ᠵᠢᠭᠠᠨ ᠠᠮᠠᠯᠳᠠᠶ᠎ᠠ︾ ᠭᠡᠵᠦ ᠲᠠᠩᠭᠠᠷᠢᠭ ᠲᠠᠯᠪᠢᠬᠤ ᠳᠤ᠄ ︽ᠣᠷᠤᠯᠴᠠᠬᠤ ᠳᠤ ᠬᠤᠶᠠᠷ ᠭᠡᠯᠪᠡᠷᠢ ᠪᠠᠶᠢᠳᠠᠭ︾ ᠭᠡᠵᠦ ᠰᠢᠭᠦᠭᠴᠢ ᠬᠠᠷᠢᠭᠤᠯᠪᠠ᠃     ︽ᠶᠠᠮᠠᠷ ᠬᠤᠶᠠᠷ ᠭᠡᠯᠪᠡᠷᠢ︖︾     ︽ᠨᠢᠭᠡ ᠨᠢ ᠢᠯᠡ᠂ ᠨᠦᠭᠦᠭᠡ ᠨᠢ ᠳᠠᠯᠳᠠ︾ ᠭᠡᠬᠦ ᠳᠤ ᠬᠠᠷ᠎ᠠ ᠪᠠᠭᠠᠪᠠᠭᠠᠢ ᠢᠨᠢᠶᠡᠵᠦ᠄ ︽ᠡᠨᠡ ᠬᠤᠶᠠᠷ ᠤᠨ ᠠᠯᠢᠨ ᠨᠢ ᠴᠣ᠋ ᠨᠠᠮ᠎ᠠ ᠳᠤ ᠪᠠᠶᠢᠬᠤ ᠦᠭᠡᠢ︾ ᠭᠡᠳ ᠰᠡᠳᠬᠢᠯ ᠠᠭᠤᠵᠢᠷᠠᠨ ᠣᠷᠣᠨ ᠳᠠᠭᠠᠨ ᠳᠠᠭᠢᠨ ᠰᠠᠭᠤᠯ᠎ᠠ᠃     ︽ᠭᠡᠪᠡᠴᠦ ᠴᠢ ᠣᠷᠣᠯᠴᠠᠬᠰᠠᠨ ᠮᠥᠷᠲᠡᠭᠡᠨ ᠪᠤᠵᠠᠷ ᠣᠯᠵᠠ ᠶᠢ ᠬᠤᠪᠢᠶᠠᠭᠰᠠᠨ ᠨᠢᠭᠦᠯ ᠲᠠᠢ︾ ᠭᠡᠬᠦ ᠳᠤ ᠰᠠᠭᠤᠭᠰᠠᠨ ᠬᠠᠷ᠎ᠠ ᠪᠠᠭᠠᠪᠠᠭᠠᠢ ᠣᠷᠣ ᠠᠴᠠ ᠪᠠᠨ ᠥᠨᠳᠡᠶᠢᠬᠦ ᠵᠠᠭᠤᠷ᠎ᠠ᠄ ︽ᠶᠠᠭᠠᠬᠢᠭᠠᠳ︖︾ ᠭᠡᠪᠡ᠃     ︽ᠴᠢ ᠬᠦᠷᠡᠩ ᠪᠠᠭᠠᠪᠠᠭᠠᠢ ᠳᠤ ᠬᠤᠶᠠᠭ ᠢᠶᠠᠨ ᠵᠢᠭᠡᠯᠡᠭᠦᠯᠦᠭᠰᠡᠨ ᠪᠢᠰᠢ ᠶᠤᠮ ᠦᠦ︖ ᠬᠦᠷᠡᠩ ᠪᠠᠭᠠᠪᠠᠭᠠᠢ ᠴᠢᠨᠦ ᠬᠤᠶᠠᠭ ᠢ ᠡᠮᠦᠰᠦᠭᠡᠳ ᠪᠠᠯ ᠳᠡᠭᠡᠷᠡᠮᠳᠡᠵᠦ ᠪᠠᠯᠳᠣ ᠵᠥᠭᠡᠢ ᠶᠢᠨ ᠰᠦᠷᠦᠭ ᠲᠤ ᠨᠥᠬᠦᠵᠦ ᠪᠣᠯᠣᠰᠢ ᠦᠭᠡᠢ ᠦᠷᠡᠭᠳᠡᠯ ᠰᠦᠢᠳᠦᠯ ᠠᠪᠴᠢᠷᠠᠭᠰᠠᠨ ᠪᠠᠶᠢᠳᠠᠭ᠃ ᠪᠡᠯᠳᠦ ᠵᠥᠭᠡᠢ ᠨᠦᠭᠦᠳ ᠴᠢᠨᠦ ᠥᠭᠭᠦᠭᠰᠡᠨ ᠬᠤᠶᠠᠭ ᠤᠨ ᠤᠷᠰᠢᠭ ᠢᠶᠠᠷ ᠬᠦᠷᠡᠩ ᠪᠠᠭᠠᠪᠠᠭᠠᠢ ᠶᠢ ᠲᠡᠶᠢᠯᠵᠦ ᠴᠢᠳᠠᠬᠤ ᠦᠭᠡᠢ᠂ ᠬᠤᠶᠠᠷ ᠲᠠᠯ᠎ᠠ ᠶᠢᠨ ᠲᠡᠩᠴᠡᠭᠦᠷᠢ ᠶᠢ ᠬᠠᠷᠰᠢᠯᠠᠭᠰᠠᠨ ᠪᠠᠶᠢᠳᠠᠭ᠃ ᠡᠭᠦᠨ ᠠᠴᠠ ᠤᠷᠢᠲᠠᠢ ᠡᠶᠢᠮᠦ ᠤᠴᠢᠷ ᠭᠠᠷᠤᠭ᠎ᠠ ᠦᠭᠡᠢ ᠪᠣᠯᠣᠭᠠᠳ ᠪᠠᠶᠢᠳᠠᠭ᠃ ᠪᠦᠷ ᠯᠡ ᠴᠢᠨᠦ ᠤᠷᠰᠢᠭ ᠠᠴᠠ ᠪᠣᠯᠤᠭᠰᠠᠨ ᠬᠡᠷᠡᠭ ᠪᠢᠰᠢ ᠶᠤᠮ ᠦᠦ︖︾ ᠭᠡᠬᠦ ᠳᠤ ᠬᠠᠷ᠎ᠠ ᠪᠠᠭᠠᠪᠠᠭᠠᠢ ᠲᠠᠭ ᠳᠤᠭᠤᠢ ᠪᠣᠯᠪᠠ᠃ ᠰᠢᠭᠦᠭᠴᠢ ᠨᠣᠶᠠᠨ ᠵᠠᠯᠭᠠᠭᠠᠳ᠄ ︽    ᠡᠶᠢᠮᠦ ᠪᠣᠯᠣᠨ᠎ᠠ ᠭᠡᠭᠴᠢ ᠶᠢ ᠴᠢ ᠤᠷᠢᠳ ᠪᠤᠳᠣᠵᠣ ᠥᠩᠭᠡᠷᠡᠪᠡ ᠦᠦ︖︾ ᠭᠡᠬᠦ ᠳᠤ ᠬᠠᠷ᠎ᠠ ᠪᠠᠭᠠᠪᠠᠭᠠᠢ ᠪᠡᠶ᠎ᠡ ᠪᠠᠨ ᠥᠮᠥᠭᠡᠷᠡᠨ᠄     ︽ᠦᠭᠡᠢ︕︾ ᠭᠡᠯ᠎ᠡ᠃     ︽ᠪᠢ ᠴᠢᠨᠦ ᠢᠩᠭᠢᠵᠦ ᠬᠡᠯᠡᠬᠦ ᠶᠢ ᠮᠡᠳᠡᠨ᠎ᠡ᠂ ᠭᠡᠪᠡᠴᠦ ᠠᠰᠠᠭᠤᠬᠤ ᠯᠠ ᠠᠯᠪᠠ ᠲᠠᠢ︾ ᠭᠡᠵᠦ ᠠᠷᠰᠯᠠᠨ ᠥᠭᠦᠯᠡᠭᠡᠳ᠄ ︽ᠴᠢ ᠶᠠᠭᠤᠨ ᠳᠤ ᠬᠦᠷᠡᠩ ᠪᠠᠭᠠᠪᠠᠭᠠᠢ ᠳᠤ ᠪᠤᠯᠳᠠᠭ ᠦᠭᠡᠢ ᠬᠤᠶᠠᠭ ᠢᠶᠠᠨ ᠵᠢᠭᠡᠯᠡᠵᠦ ᠥᠭᠭᠦᠭᠰᠡᠨ ᠶᠤᠮ︖︾ ᠭᠡᠬᠦ ᠳᠤ ᠬᠠᠷ᠎ᠠ ᠪᠠᠭᠠᠪᠠᠭᠠᠢ ᠪᠥᠬᠦ᠋ᠢᠭᠰᠡᠨ ᠲᠣᠯᠣᠭᠠᠢ ᠪᠠᠨ ᠡᠷᠭᠦᠨ ᠰᠢᠭᠦᠭᠴᠢ ᠨᠣᠶᠠᠨ ᠢ     ᠬᠠᠷᠠᠭᠠᠳ᠄ ︽     ᠲᠡᠷᠡ ᠵᠢᠭᠡᠯᠡᠶ᠎ᠡ ᠭᠡᠵᠦ ᠭᠤᠶᠣᠭᠰᠠᠨ ᠶᠤᠮ︾ ᠭᠡᠪᠡ᠃     ︽ᠶᠠᠭᠤᠨ ᠳᠤ ᠵᠢᠭᠡᠯᠡᠵᠦ ᠪᠠᠶᠢᠭ᠎ᠠ ᠶᠤᠮ︖︾     ︽ᠮᠢᠨᠤ ᠰᠠᠶᠢᠨ ᠨᠠᠶᠢᠵᠠ︕︾     ︽ᠰᠠᠶᠢᠨ ᠨᠠᠶᠢᠵᠠ ᠴᠢᠨᠢ ᠪᠦᠲᠦᠯ ᠦᠭᠡᠢ ᠬᠡᠷᠡᠭ ᠬᠢᠵᠦ ᠪᠠᠶᠢᠬᠤ ᠳᠤ ᠴᠢ ᠶᠠᠭᠠᠬᠢᠭᠠᠳ ᠬᠤᠷᠢᠭᠯᠠᠳᠠᠭ ᠦᠭᠡᠢ ᠶᠤᠮ︖︾     ︽ᠨᠠᠳᠠ ᠳᠤ ᠪᠠᠯ ᠠᠪᠴᠢᠷᠠᠵᠤ ᠦᠭᠳᠡᠭ ᠶᠤᠮ︾ ᠭᠡᠳ ᠬᠠᠷ᠎ᠠ ᠪᠠᠭᠠᠪᠠᠭᠠᠢ ᠭᠠᠵᠠᠷ ᠱᠠᠭᠠᠶᠢᠨ ᠵᠣᠬᠰᠣᠬᠤ ᠳᠠᠭᠠᠨ᠄ ︽ᠪᠢ ᠬᠢᠯᠢᠰ ᠰᠢᠣ ᠳ᠋ᠠ︾ ᠬᠡᠮᠡᠨ ᠳᠦᠳᠦᠨᠡᠪᠡ᠃     ᠰᠢᠭᠦᠭᠴᠢ ᠡᠯᠭᠦᠵᠦ ᠠᠪᠤᠭᠠᠳ᠄ ︽ᠴᠢ ᠬᠢᠯᠢᠰᠳᠡᠯ᠎ᠡ ᠭᠡᠨ᠎ᠡ︖ ᠬᠦᠷᠡᠩ ᠪᠠᠭᠠᠪᠠᠭᠠᠢ ᠶᠢᠨ ᠪᠦᠲᠦᠯ ᠦᠭᠡᠢ ᠬᠡᠷᠡᠭ ᠬᠢᠬᠦ ᠳᠤ ᠬᠤᠶᠠᠭ ᠢᠶᠠᠨ ᠥᠭᠴᠦ ᠲᠤᠰᠠᠯᠠᠬᠤ᠂     ᠳᠡᠭᠡᠷᠡᠮᠳᠡᠭᠰᠡᠨ ᠪᠠᠯ ᠢ ᠨᠢ ᠬᠤᠪᠢᠶᠠᠯᠴᠠᠵᠤ ᠢᠳᠡᠬᠦ᠂ ᠪᠡᠯᠳᠦ ᠵᠥᠭᠡᠢ ᠳᠤ ᠨᠥᠬᠦᠵᠦ ᠪᠣᠯᠣᠰᠢ ᠦᠭᠡᠢ ᠦᠷᠡᠭᠳᠡᠯ ᠰᠦᠢᠳᠦᠯ ᠤᠴᠠᠷᠠᠭᠤᠯᠬᠤ᠃ ᠡᠨᠡ ᠴᠢᠨᠢ ᠬᠢᠯᠢᠰ     ᠬᠡᠷᠡᠭ ᠦᠦ︖ ᠴᠢ ᠬᠢᠯᠢᠰᠳᠡᠭᠰᠡᠨ ᠪᠣᠯ ᠪᠡᠯᠳᠦ ᠵᠥᠭᠡᠢ ᠶᠢ ᠶᠠᠭᠤ ᠭᠡᠬᠦ ᠶᠤᠮ︖ ᠴᠢ ᠪᠣᠯ ᠨᠢᠭᠦᠯ ᠤᠨ ᠬᠠᠮᠰᠠᠭᠠᠲᠠᠨ ᠪᠠᠶᠢᠨ᠎ᠠ︾ ᠭᠡᠬᠦ ᠳᠤ ᠬᠠᠷ᠎ᠠ ᠪᠠᠭᠠᠪᠠᠭᠠᠢ     ᠣᠷᠳᠣ ᠪᠠᠷ ᠰᠠᠨᠠᠭ᠎ᠠ ᠠᠯᠳᠠᠬᠤ ᠳᠤ ᠴᠡᠷᠢᠭ ᠤᠳ ᠲᠡᠭᠦᠨ ᠢ ᠬᠠᠵᠠᠭᠤ ᠶᠢᠨ ᠥᠷᠥᠭᠡᠨ ᠳᠤ ᠠᠪᠠᠴᠢᠵᠤ ᠬᠤᠷᠢᠯ᠎ᠠ᠃     ᠠᠷᠰᠯᠠᠨ ᠬᠦᠷᠡᠩ ᠪᠠᠭᠠᠪᠠᠭᠠᠢ ᠶᠢ ᠭᠡᠷ ᠠᠴᠠ ᠨᠢ ᠳᠠᠭᠤᠳᠠᠨ ᠢᠷᠡᠭᠦᠯᠦᠭᠡᠳ᠄     ︽ᠴᠢ ᠶᠠᠭᠠᠬᠢᠭᠠᠳ ᠵᠥᠭᠡᠢ ᠨᠦᠭᠦᠳ ᠤᠨ ᠬᠠᠳᠬᠤᠬᠤ ᠠᠴᠠ ᠠᠶᠤᠳᠠᠭ ᠦᠭᠡᠢ ᠶᠤᠮ︖︾ ᠭᠡᠬᠦ ᠳᠤ ᠬᠦᠷᠡᠩ ᠪᠠᠭᠠᠪᠠᠭᠠᠢ ᠪᠡᠶ᠎ᠡ ᠪᠠᠨ ᠬᠠᠷᠠᠭᠠᠳ᠄     ︽ᠬᠤᠶᠠᠭ ᠲᠠᠢ︾ ᠭᠡᠪᠡ᠃     ︽ᠡᠨᠡ ᠬᠤᠶᠠᠭ ᠴᠢᠨᠦ ᠶᠤᠮ ᠦᠦ︖︾     ︽ᠪᠢᠰᠢ ᠠ᠋︕︾     ︽ᠬᠠᠮᠢᠭ᠎ᠠ ᠠᠴᠠ ᠣᠯᠣᠭᠰᠠᠨ ᠶᠤᠮ︖︾     ︽ᠵᠢᠭᠡᠯᠡᠭᠰᠡᠨ ᠶᠤᠮ︾     ︽ᠬᠡᠨ ᠠᠴᠠ︖︾ ᠬᠦᠷᠡᠩ ᠪᠠᠭᠠᠪᠠᠭᠠᠢ ᠳᠤᠭᠤᠢ ᠪᠠᠶᠢᠭᠰᠠᠨ ᠢᠶᠠᠨ᠄ ︽ᠪᠢ ᠬᠡᠯᠡᠬᠦ ᠦᠭᠡᠢ ᠪᠠᠶᠢᠵᠤ ᠪᠣᠯᠣᠨ᠎ᠠ ᠦᠦ︖︾ ᠭᠡᠬᠦ ᠳᠤ ᠰᠢᠭᠦᠭᠴᠢ ᠠᠷᠰᠯᠠᠨ᠄ ︽ᠪᠣᠯᠣᠨ᠎ᠠ᠂ ᠡᠨᠡ ᠪᠣᠯ ᠴᠢᠨᠦ ᠡᠷᠬᠡ ᠴᠢᠯᠦᠭᠡ᠃ ᠭᠡᠪᠡᠴᠦ ᠶᠠᠯ᠎ᠠ ᠴᠢᠨᠢ ᠬᠦᠨᠳᠦᠷᠡᠨ᠎ᠡ︾ ᠭᠡᠬᠦ ᠳᠤ ᠬᠦᠷᠡᠩ ᠪᠠᠭᠠᠪᠠᠭᠠᠢ ᠭᠦᠨ ᠠᠮᠢᠰᠬᠤᠭ᠎ᠠ ᠠᠪᠤᠭᠠᠳ᠄ ︽ᠬᠠᠷ᠎ᠠ ᠪᠠᠭᠠᠪᠠᠭᠠᠢ ᠶᠢᠨ ᠬᠤᠶᠠᠭ ᠶᠤᠮ︾ ᠭᠡᠯ᠎ᠡ᠃ ᠬᠠᠵᠠᠭᠤ ᠥᠷᠥᠭᠡᠨ ᠳᠤ ᠳᠠᠯᠳᠠᠯᠠᠵᠤ ᠪᠠᠶᠢᠭᠰᠠᠨ ᠬᠠᠷ᠎ᠠ ᠪᠠᠭᠠᠪᠠᠭᠠᠢ ᠰᠣᠨᠣᠰᠤᠭᠠᠳ ᠬᠠᠭ᠋ᠠᠴᠢᠬᠠᠬᠤ ᠰᠢᠬᠠᠪᠠ᠃ ᠬᠠᠷ᠎ᠠ ᠪᠠᠭᠠᠪᠠᠭᠠᠢ ᠶᠢᠨ᠄ ︽ᠴᠢ᠂ ᠴᠢ ᠁︾ ᠭᠡᠭᠰᠡᠭᠡᠷ ᠰᠠᠨᠳᠤᠷᠤᠨ ᠭᠠᠷᠴᠤ ᠢᠷᠡᠬᠦ ᠶᠢ ᠦᠵᠡᠭᠰᠡᠨ ᠬᠦᠷᠡᠩ ᠪᠠᠭᠠᠪᠠᠭᠠᠢ᠄ ︽ᠴᠢᠨᠦ ᠬᠤᠶᠠᠭ ᠤᠨ ᠤᠷᠰᠢᠭ ᠢᠶᠠᠷ ᠪᠢ ᠳᠠᠪᠠᠮᠠᠭᠠᠶᠢᠷᠠᠭᠰᠠᠭᠠᠷ ᠪᠠᠶᠢᠵᠤ ᠥᠨᠥᠳᠥᠷ ᠤᠨ ᠡᠨᠡ ᠬᠡᠮᠵᠢᠶᠡᠨ ᠳᠤ ᠭᠦᠷᠦᠭᠰᠡᠨ ᠰᠢᠣ ᠳ᠋ᠠ᠃ ︿ᠵᠢᠭᠡᠯᠡᠬᠦ ᠦᠭᠡᠢ︕﹀ ᠭᠡᠬᠦ ᠳᠤ ᠴᠢ᠄ ︿ᠠᠪ᠂ ᠠᠪ᠂ ᠬᠥᠯᠥᠰᠦᠨ ᠳᠤᠨᠢ ᠵᠢᠭᠠᠬᠠᠨ ᠪᠠᠯ ᠥᠭᠴᠢᠬᠡᠪᠡᠯ ᠪᠣᠯᠴᠢᠬᠠᠨ᠎ᠠ﹀ ᠭᠡᠳ ᠠᠮᠠᠨ ᠳᠤ ᠴᠣ᠋ ᠦᠭᠡᠢ᠂ ᠬᠠᠮᠠᠷ ᠲᠤ ᠴᠣ᠋ ᠦᠭᠡᠢ ᠪᠤᠯᠬᠤ ᠠᠴᠠ ᠵᠣᠪᠠᠵᠤ ᠪᠢ ᠢᠯᠡᠭᠦᠦ ᠣᠯᠬᠤ ᠭᠡᠳ ᠁︾ ᠭᠡᠵᠦ ᠬᠠᠵᠠᠯ᠎ᠠ᠃ ᠬᠠᠷ᠎ᠠ ᠪᠠᠭᠠᠪᠠᠭᠠᠢ ᠶᠢᠨ ᠨᠢᠳᠦ ᠨᠢ ᠪᠦᠯᠳᠦᠭᠡᠨᠡᠭᠦ ᠠᠴᠠ ᠥᠭᠡᠷ᠎ᠡ ᠠᠷᠭ᠎ᠠ ᠠᠯᠠᠭ᠎ᠠ ᠪᠣᠯᠪᠠ᠃ ᠴᠡᠷᠢᠭ ᠤᠳ ᠬᠦᠷᠡᠩ ᠪᠠᠭᠠᠪᠠᠭᠠᠢ ᠶᠢᠨ ᠭᠡᠷ ᠠᠴᠠ ᠠᠪᠴᠢᠷᠠᠭᠰᠠᠨ ᠬᠤᠶᠠᠭ ᠢ ᠲᠡᠷᠡ ᠬᠤᠶᠠᠷ ᠤᠨ ᠡᠮᠦᠨ᠎ᠡ ᠲᠠᠯᠪᠢᠬᠤ ᠳᠤ᠄ ︽ᠴᠢᠨᠦ ᠡᠮᠦᠰᠦᠭᠰᠡᠨ ᠬᠤᠶᠠᠭ ᠮᠥᠨ ᠦᠦ︖︾ ᠭᠡᠵᠦ ᠠᠷᠰᠯᠠᠨ ᠬᠦᠷᠡᠩ ᠪᠠᠭᠠᠪᠠᠭᠠᠢ ᠠᠴᠠ ᠠᠰᠠᠭᠤᠯ᠎ᠠ᠃ ︽ᠮᠥᠨ︕︾ ︽ᠵᠠ᠂ ᠮᠥᠨ ᠪᠣᠯ ᠠᠳᠡ ᠭᠠᠷ ᠤᠨ ᠦᠰᠦᠭ ᠵᠢᠷᠤ︕︾ ᠭᠡᠵᠦ ᠥᠭᠡᠳᠡ ᠠᠴᠠ ᠨᠢ ᠪᠢᠷ ᠴᠠᠭᠠᠰᠤ ᠲᠦᠯᠬᠢᠪᠡ᠃ ᠰᠢᠭᠦᠭᠴᠢ ᠳᠠᠭᠢᠭᠠᠳ ᠬᠠᠷ᠎ᠠ ᠪᠠᠭᠠᠪᠠᠭᠠᠢ ᠶᠢ ᠬᠠᠷᠠᠵᠤ᠄ ︽ᠴᠢᠨᠦ ᠬᠦᠷᠡᠩ ᠪᠠᠭᠠᠪᠠᠭᠠᠢ ᠳᠤ ᠵᠢᠭᠡᠯᠡᠵᠦ ᠥᠭᠭᠦᠭᠰᠡᠨ ᠬᠤᠶᠠᠭ ᠴᠢᠨᠢ ᠮᠥᠨ ᠦᠦ︖︾ ᠭᠡᠬᠦ ᠳᠤ ᠬᠤᠶᠠᠭ ᠢᠶᠠᠨ ᠦᠵᠡᠭᠡᠳ ᠪᠠᠶᠠᠷᠯᠠᠭᠰᠠᠨ ᠬᠠᠷ᠎ᠠ ᠪᠠᠭᠠᠪᠠᠭᠠᠢ᠄ ︽ᠮᠢᠨᠤ ᠬᠤᠶᠠᠭ ᠶᠠᠭ ᠮᠥᠨ︾ ᠭᠡᠳ ᠶᠠᠭᠤᠮ᠎ᠠ ᠪᠠᠨ ᠠᠪᠬᠤ ᠭᠡᠬᠦ ᠳᠤ ᠬᠠᠷᠠᠵᠤ ᠵᠣᠭᠰᠣᠭᠰᠠᠨ ᠬᠤᠶᠠᠭ ᠤᠳ ᠭᠦᠶᠦᠯᠳᠦᠨ ᠢᠷᠡᠭᠡᠳ ᠬᠠᠷ᠎ᠠ ᠪᠠᠭᠠᠪᠠᠭᠠᠢ ᠶᠢ ᠰᠠᠨᠳᠠᠯᠢ ᠳᠡᠭᠡᠷ᠎ᠡ ᠨᠢ ᠳᠠᠷᠤᠵᠤ ᠰᠠᠭᠤᠯᠭᠠᠯ᠎ᠠ᠃ ︽ᠵᠠ᠂ ᠮᠥᠨ ᠪᠣᠯ ᠡᠨᠡ ᠳᠡᠭᠡᠷ᠎ᠡ ᠭᠠᠷ ᠤᠨ ᠦᠰᠦᠭ ᠵᠢᠷᠤᠵᠤ ᠬᠤᠷᠤᠭᠤ ᠪᠠᠨ ᠳᠠᠷᠤ︕︾ ᠭᠡᠵᠦ ᠰᠢᠭᠦᠭᠴᠢ ᠬᠡᠯᠡᠵᠦ ᠪᠠᠶᠢᠲᠠᠯ᠎ᠠ᠄ ︽ᠣᠷᠣᠵᠤ ᠪᠤᠯᠬᠤ ᠦᠦ︖ ︾ ᠭᠡᠭᠰᠡᠭᠡᠷ ᠪᠡᠯᠳᠦ ᠵᠥᠭᠡᠢ ᠨᠦᠭᠦᠳ ᠴᠤᠪᠤᠷᠠᠯᠳᠤᠨ ᠣᠷᠣᠵᠤ ᠢᠷᠡᠬᠦ ᠳᠤ ᠬᠤᠶᠠᠷ ᠪᠠᠭᠠᠪᠠᠭᠠᠢ ᠳᠣᠭᠤᠭᠰᠢ ᠬᠠᠷᠠᠨ ᠬᠠᠷᠠᠴᠠ ᠪᠤᠷᠤᠭᠤᠯᠠᠪᠠ᠃ ︽ᠵᠥᠭᠡᠢ ᠨᠦᠭᠦᠳ ᠠ᠋᠂ ᠬᠦᠷᠡᠩ ᠪᠠᠭᠠᠪᠠᠭᠠᠢ ᠶᠢᠨ ᠡᠮᠦᠰᠦᠭᠡᠳ ᠲᠠ ᠨᠠᠷ ᠤᠨ ᠪᠠᠯ ᠢ ᠳᠡᠭᠡᠷᠡᠮᠳᠡᠳᠡᠭ᠂ ᠬᠠᠳᠬᠤᠵᠤ ᠳᠡᠶᠢᠯᠳᠡᠭ ᠦᠭᠡᠢ ᠬᠤᠶᠠᠭ ᠡᠨᠡ ᠮᠥᠨ ᠦᠦ︖︾ ᠭᠡᠵᠦ ᠰᠢᠭᠦᠭᠴᠢ ᠠᠷᠰᠯᠠᠨ ᠬᠤᠶᠠᠷ ᠪᠠᠭᠠᠪᠠᠭᠠᠢ ᠶᠢᠨ ᠡᠮᠦᠨ᠎ᠡ ᠲᠠᠯᠪᠢᠭᠰᠠᠨ ᠬᠤᠶᠠᠭ ᠢ ᠵᠢᠭᠠᠨ ᠠᠰᠠᠭᠤᠬᠤ ᠳᠤ᠄ ︽ᠶᠠᠭ ᠮᠥᠨ ᠪᠠᠶᠢᠨ᠎ᠠ︕︾ ᠭᠡᠵᠦ ᠵᠥᠭᠡᠢ ᠨᠦᠭᠦᠳ ᠲᠠᠭᠤ ᠨᠢᠭᠡᠲᠡᠢ ᠳᠤᠤᠭᠠᠷᠬᠤ ᠳᠠᠭᠠᠨ ᠬᠤᠶᠠᠷ ᠪᠠᠭᠠᠪᠠᠭᠠᠢ ᠶᠢ ᠬᠤᠷᠣᠰᠤᠯᠲᠠᠢ ᠬᠠᠷᠠᠵᠠᠭᠠᠯ᠎ᠠ᠃ ᠬᠠᠷᠠᠴᠠ ᠪᠠᠷ ᠢᠶᠠᠨ ᠬᠠᠳᠬᠤᠭᠠᠳ ︽ᠶᠠᠪᠤᠭᠤᠯᠴᠢᠬᠠᠯ᠎ᠠ︾ ᠭᠡᠭᠴᠢ ᠡᠨᠡ ᠦᠦ︖ ᠬᠦᠷᠡᠩ ᠪᠠᠭᠠᠪᠠᠭᠠᠢ ᠶᠢᠨ ᠪᠡᠶ᠎ᠡ ᠡᠪᠡᠳᠬᠦ‍ ᠰᠢᠭ ᠪᠣᠯᠵᠠᠢ᠃ ᠰᠢᠭᠦᠭᠴᠢ ᠨᠣᠶᠠᠨ ᠠᠷᠰᠯᠠᠨ᠄ ︽ᠭᠡᠷᠡᠴᠢ ᠪᠦᠷ ᠪᠡᠯᠡᠨ ᠪᠣᠯᠤᠭᠰᠠᠨ ᠤᠴᠢᠷ ᠣᠳᠤ ᠵᠠᠷᠯᠠᠨ᠎ᠠ︾ ᠭᠡᠬᠦ ᠳᠤ ᠪᠦᠭᠦᠳᠡ ᠨᠠᠮ ᠵᠢᠮ ᠪᠣᠯᠪᠠ᠃ ᠪᠥᠬᠦ᠋ᠢᠭᠰᠡᠨ ᠬᠤᠶᠠᠷ ᠪᠠᠭᠠᠪᠠᠭᠠᠢ ᠲᠣᠯᠣᠭᠠᠢ ᠡᠷᠭᠦᠨ ᠰᠢᠭᠦᠭᠴᠢ ᠶᠢ ᠬᠠᠷᠠᠬᠤ ᠨᠢ ᠶᠠᠭᠤ ᠪᠣᠯᠪᠠ︖ ᠬᠡᠮᠡᠨ ᠠᠰᠠᠭᠤᠬᠤ ᠮᠡᠲᠦ᠃ ︽ᠬᠦᠷᠡᠩ ᠪᠠᠭᠠᠪᠠᠭᠠᠢ ᠶᠢᠨ ᠪᠠᠯ ᠢᠳᠡᠬᠦ ᠳᠤᠷᠠᠰᠢᠯ ᠢ ᠨᠠᠰᠣᠨ ᠲᠤᠷᠰᠢ ᠬᠠᠰᠤᠵᠤ᠂ ᠮᠢᠩᠭᠠᠨ ᠮᠦ ᠴᠡᠴᠡᠭ ᠲᠠᠷᠢᠨ᠂ ᠡᠨᠡ ᠮᠢᠩᠭᠠᠨ ᠮᠦ ᠴᠡᠴᠡᠭ ᠢ ᠨᠠᠰᠣᠨ ᠲᠤᠷᠰᠢ ᠠᠷᠠᠴᠢᠯᠠᠵᠤ᠂ ᠪᠠᠯᠳᠦ ᠵᠥᠭᠡᠢ ᠶᠢᠨ ᠪᠠᠯ ᠴᠤᠭᠯᠠᠭᠤᠯᠬᠤ ᠳᠤ ᠦᠢᠯᠡᠴᠢᠯᠡᠨ ᠦᠷ᠎ᠡ ᠬᠤᠶᠢᠴᠢᠰ ᠢᠶᠠᠨ ᠪᠤᠶᠢᠵᠢᠭᠤᠯᠬᠤ ᠳᠤ ᠰᠢᠮ᠎ᠡ ᠲᠡᠵᠢᠭᠡᠯ ᠬᠠᠩᠭᠠᠬᠤ ᠪᠠᠷ ᠶᠠᠯᠠᠯᠠᠨ᠎ᠠ᠃ ᠬᠠᠷ᠎ᠠ ᠪᠠᠭᠠᠪᠠᠭᠠᠢ ᠬᠦᠷᠡᠩ ᠪᠠᠭᠠᠪᠠᠭᠠᠢ ᠶᠢᠨ ᠬᠡᠷᠡᠭ ᠬᠢᠬᠦ ᠳᠤ ᠪᠣᠳᠠᠰ ᠤᠨ ᠨᠥᠬᠦᠴᠡᠯ ᠬᠠᠩᠭᠠᠵᠤ᠂ ᠬᠦᠷᠡᠩ ᠪᠠᠭᠠᠪᠠᠭᠠᠢ ᠶᠢᠨ ᠪᠤᠯᠢᠶᠠᠵᠤ ᠳᠡᠭᠡᠷᠡᠮᠳᠡᠭᠰᠡᠨ ᠪᠤᠵᠠᠷ ᠣᠯᠵᠠ ᠶᠢ ᠮᠡᠳᠡᠵᠦ ᠪᠠᠶᠢᠲᠠᠯ᠎ᠠ ᠬᠤᠪᠢᠶᠠᠯᠴᠠᠭᠰᠠᠨ ᠤᠴᠢᠷ ᠬᠤᠶᠠᠭ ᠢ ᠨᠢ ᠬᠤᠷᠢᠶᠠᠵᠤ ᠠᠪᠬᠤ᠂ ᠭᠤᠷᠪᠠᠨ ᠵᠠᠭᠤᠨ ᠮᠦ ᠴᠡᠴᠡᠭ ᠲᠠᠷᠢᠨ᠂ ᠡᠨᠡ ᠭᠤᠷᠪᠠᠨ ᠵᠠᠭᠤᠨ ᠮᠦ ᠴᠡᠴᠡᠭ ᠢ ᠨᠠᠰᠣᠨ ᠲᠤᠷᠰᠢ ᠠᠷᠠᠴᠢᠯᠠᠵᠤ᠂ ᠪᠠᠯᠳᠦ ᠵᠥᠭᠡᠢ ᠶᠢᠨ ᠪᠠᠯ ᠴᠤᠭᠯᠠᠭᠤᠯᠬᠤ ᠳᠤ ᠦᠢᠯᠡᠴᠢᠯᠡᠨ ᠦᠷ᠎ᠡ ᠬᠤᠶᠢᠴᠢᠰ ᠢᠶᠠᠨ ᠪᠤᠶᠢᠵᠢᠭᠤᠯᠬᠤ ᠳᠤ ᠰᠢᠮ᠎ᠡ ᠲᠡᠵᠢᠭᠡᠯ ᠬᠠᠩᠭᠠᠬᠤ ᠪᠠᠷ ᠶᠠᠯᠠᠯᠠᠨ᠎ᠠ᠃ ᠡᠨᠡ ᠡᠳᠦᠷ ᠠᠴᠠ ᠡᠬᠢᠯᠡᠨ ᠪᠤᠴᠠᠯᠲᠠ ᠦᠭᠡᠢ ᠬᠡᠷᠡᠭᠵᠢᠭᠦᠯᠦᠨ᠎ᠡ︾ ᠭᠡᠬᠦ ᠳᠤ ᠬᠠᠷ᠎ᠠ ᠪᠠᠭᠠᠪᠠᠭᠠᠢ ᠰᠠᠨᠳᠤᠷᠤᠨ ᠭᠠᠵᠠᠷ ᠰᠠᠮᠠᠭᠠᠷᠳᠠᠨ ᠭᠠᠰᠠᠯᠵᠤ᠄ ︽ᠳᠡᠭᠡᠳᠦᠰ ᠠᠴᠠ ᠮᠢᠨᠢ ᠥᠪᠯᠡᠵᠦ ᠢᠷᠡᠭᠰᠡᠨ ᠠᠯᠳᠠᠨ ᠬᠤᠶᠠᠭ ᠮᠢᠨᠢ ᠠ᠋︕︾ ᠭᠡᠬᠦ ᠳᠤ ᠰᠢᠭᠦᠭᠴᠢ ᠨᠣᠶᠠᠨ᠄ ︽ᠠᠯᠳᠠ ᠪᠠᠶᠢᠲᠤᠭᠠᠢ᠂ ᠡᠷᠳᠡᠨᠢ ᠪᠠᠶᠢᠯ᠎ᠠ ᠴᠣ᠋ ᠭᠡᠰᠡᠨ ᠡᠶᠢᠮᠦ ᠯᠠ ᠪᠣᠯᠤᠭᠰᠠᠨ︾ ᠭᠡᠯ᠎ᠡ᠃
ᠢᠷᠡᠯᠲᠡ᠄ ᠳᠤᠮᠳᠠᠳᠤ ᠤᠯᠤᠰ ᠤᠨ ᠮᠤᠩᠭᠤᠯ ᠬᠡᠯᠡᠨ ᠤ ᠰᠤᠨᠢᠨ ᠮᠡᠳᠡᠭᠡ ᠶᠢᠨ ᠰᠦᠯᠵᠢᠶ᠎ᠡ