ᠠᠷᠭᠠᠳᠠᠬᠤᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2025/6/23
    ᠠᠭᠤᠤ ᠣᠷᠴᠢᠯᠠᠩ ᠤᠨ ᠡᠨᠡ ᠠᠭᠤᠳᠠᠮ ᠵᠠᠢ ᠳᠤ ᠬᠥᠭᠡᠷᠦᠬᠦᠢ ᠴᠡᠩᠬᠡᠷ ᠪᠥᠮᠪᠥᠷᠴᠡᠭ ᠮᠢᠨᠢ ᠡᠬᠡ ᠶᠢᠨ ᠬᠡᠪᠡᠯᠢ ᠳᠤ ᠠᠮᠢᠰᠬᠤᠨ ᠪᠥᠮᠪᠥᠷᠢᠬᠦ ᠭᠦᠪᠦᠷᠡᠯ ᠮᠡᠲᠦ ᠡᠩᠬᠦᠷᠡᠶᠢᠬᠡᠨ᠂ ᠡᠮᠵᠡᠭᠬᠡᠨ ᠬᠠᠷᠠᠭᠳᠠᠨ᠎ᠠ ᠪᠢᠵᠡ︖ ᠲᠡᠶᠢᠮᠦ ᠰᠢᠦ᠂ ᠶᠡᠭᠡ ᠡᠮᠵᠡᠭ ᠶᠡᠭᠡ ᠡᠩᠬᠦᠷᠡᠢ ᠠᠵᠢ᠃ ᠡᠨᠡ ᠬᠦ ᠨᠠᠨᠳᠢᠨ ᠡᠩᠬᠦᠷᠡᠢ᠂ ᠡᠮᠵᠡᠭ ᠬᠤᠪᠣᠷ ᠡᠷᠳᠡᠨᠢ ᠳᠡᠭᠡᠷ᠎ᠡ ᠲᠦᠮᠡ ᠮᠢᠩᠭᠠᠨ ᠠᠮᠢ ᠨᠠᠰᠤ ᠲᠦᠮᠡ ᠮᠢᠩᠭᠠᠨ ᠵᠢᠯ ᠣᠷᠣᠰᠢᠨ ᠪᠤᠢ᠃ ᠬᠡᠴᠢᠨᠡᠭᠡᠨ ᠨᠠᠨᠳᠢᠨ᠂ ᠬᠡᠴᠢᠨᠡᠭᠡᠨ ᠤᠷᠠᠨ᠂ ᠬᠡᠴᠢᠨᠡᠭᠡᠨ ᠡᠷᠬᠢᠮ ᠠᠵᠢ᠃ ᠠᠮᠢ ᠣᠷᠣᠰᠢᠬᠤ ᠶᠢᠨ ᠴᠡᠩᠭᠡᠭ ᠠᠭᠠᠷ ᠶᠠᠮᠠᠷ ᠠᠭᠤᠤ ᠪᠢᠯᠡ︖ ᠬᠡᠴᠢᠨᠡᠭᠡᠨ ᠲᠦᠮᠡᠨ ᠵᠢᠯ ᠳᠤ ᠶᠠᠭᠠᠬᠢᠵᠤ ᠪᠦᠷᠢᠯᠳᠦᠨ ᠲᠣᠭᠲᠠᠪᠠ︖     ᠨᠢᠭᠡ ᠬᠤᠷᠣᠮ ᠴᠦ ᠰᠠᠯᠤᠯ ᠦᠭᠡᠢ ᠡᠨᠡ ᠳᠡᠯᠡᠬᠡᠢ ᠶᠢᠨ ᠠᠮᠢᠳᠠᠨ ᠤᠷᠭᠤᠮᠠᠯ ᠡᠨᠡ ᠠᠷᠢᠭᠤᠨ ᠨᠠᠨᠳᠢᠨ ᠡᠬᠡ ᠶᠢᠨ ᠰᠦ ᠮᠡᠲᠦ ᠠᠭᠠᠷ ᠢ ᠠᠮᠢᠰᠬᠤᠨ ᠪᠠᠶᠢᠨ᠎ᠠ ᠭᠡᠳᠡᠭ ᠢ ᠪᠤᠳᠣᠬᠤ ᠪᠠᠷ ᠴᠢ ᠪᠢᠳᠡ ᠶᠣᠰᠣᠲᠠᠢ ᠵᠠᠯᠪᠠᠷᠢᠨ᠎ᠠ ᠪᠠᠶᠢᠬ᠎ᠠ᠃ ᠪᠢ ᠠᠭᠠᠷ ᠤᠨ ᠲᠤᠬᠠᠢ ᠬᠠᠷ᠎ᠠ ᠤᠬᠠᠭᠠᠨ ᠢᠶᠠᠷ ᠢᠶᠠᠨ ᠶᠡᠭᠡ ᠪᠤᠳᠣᠵᠦ ᠰᠠᠭᠤᠳᠠᠭ ᠠ᠋᠃ ᠠᠭᠠᠷ ᠪᠡᠶ᠎ᠡ ᠳᠣᠲᠣᠭᠤᠷ ᠮᠢᠨᠢ ᠤᠷᠤᠰᠤᠨ ᠳᠣᠯᠭᠢᠶᠠᠯᠠᠵᠤ᠂ ᠵᠢᠷᠦᠬᠡ ᠲᠠᠷᠢᠬᠢ ᠶᠢ ᠠᠵᠢᠯᠯᠠᠭᠤᠯᠤᠨ ᠪᠣᠳᠣᠯᠬᠢᠯᠠᠭᠤᠯᠵᠤ᠂ ᠰᠡᠳᠬᠢᠭᠦᠯᠵᠦ ᠁ ᠪᠠᠶᠢᠨ᠎ᠠ ᠭᠡᠬᠦ ᠠᠴᠠ ᠠᠮᠢ ᠨᠠᠰᠤ ᠠᠭᠠᠷ ᠤᠨ ᠪᠦᠲᠦᠭᠡᠯ᠂ ᠠᠭᠠᠷ ᠤᠨ ᠪᠤᠳᠣᠯ ᠵᠢᠷᠦᠬᠡ ᠮᠡᠲᠦ ᠪᠣᠯᠵᠤ ᠢᠷᠡᠳᠡᠭ᠃ ᠡᠳᠦᠷ ᠰᠥᠨᠢ ᠦᠭᠡᠢ ᠠᠭᠠᠷ ᠳᠣᠲᠣᠷ᠎ᠠ ᠱᠣᠩᠪᠠᠨ ᠠᠮᠢᠳᠤᠷᠠᠵᠤ ᠪᠠᠶᠢᠬᠤ ᠪᠠᠨ ᠪᠤᠳᠣᠬᠤ ᠪᠠᠷ ᠡᠬᠡ ᠶᠢᠨ ᠠᠯᠲᠠᠨ ᠬᠡᠪᠡᠯᠢ ᠮᠡᠲᠦ ᠠᠮᠤᠭᠤᠯᠠᠩ ᠠᠷᠢᠭᠤᠨ ᠲᠠᠬᠰᠢᠨ ᠥᠯᠥᠭᠡᠢ ᠮᠢᠨᠢ ᠪᠣᠯᠣᠨ᠎ᠠ᠃ ᠠᠭᠠᠷ ᠳᠦᠭᠦᠷᠡᠩ ᠰᠢᠷᠣᠩᠬᠠᠶᠢᠯᠠᠬᠤ ᠮᠣᠩᠭᠤᠯ ᠠᠷᠠᠳ ᠤᠨ ᠳᠠᠭᠤᠤ ︽ᠠᠯᠲᠠᠨ ᠵᠢᠭᠦᠷ ᠲᠠᠢ ᠴᠡᠭᠴᠡᠦᠬᠡᠢ ᠨᠢ᠂ ᠠᠭᠠᠷ ᠠᠴᠠ ᠨᠠᠭᠠᠭᠤᠷ ᠵᠢᠷᠭᠢᠨ᠎ᠡ ᠳ᠋ᠠ︾ ᠶᠢ ᠠᠭᠤᠳᠠᠮ ᠠᠭᠠᠷ ᠠᠴᠠ ᠮᠡᠳᠡᠷᠡᠬᠦ ᠪᠠᠷ ᠠᠭᠠᠷ ᠮᠢᠨᠢ ᠪᠠᠭ᠎ᠠ ᠴᠠᠭᠠᠰᠢ ᠪᠠᠨ ᠶᠠᠪᠤᠵᠤ᠂ ᠲᠡᠭᠷᠢ ᠪᠣᠯᠵᠤ ᠢᠷᠡᠨ᠎ᠡ᠃ ᠲᠡᠶᠢᠮᠦ ᠳ᠋ᠡ᠂ ᠠᠯᠲᠠᠨ ᠵᠢᠭᠦᠷᠲᠠᠢ ᠶᠤᠮ ᠴᠢᠨᠢ ᠲᠡᠶᠢᠮᠦ ᠥᠨᠳᠥᠷ ᠲᠤ ᠳᠡᠭᠦᠯᠢᠯ ᠦᠭᠡᠢ ᠶᠠᠭᠠᠬᠢᠬᠤᠪ ︖ ᠪᠢᠳᠡᠨ ᠤ ᠰᠡᠳᠬᠢᠯ ᠳᠤ ᠠᠭᠠᠷ ᠲᠡᠭᠷᠢ ᠭᠡᠵᠦ ᠬᠤᠯᠪᠣᠨ ᠳᠠᠳᠴᠤ ᠡᠬᠢᠯᠡᠭᠰᠡᠨ ᠨᠢ ᠴᠦ ᠶᠡᠭᠡ ᠤᠴᠢᠷᠲᠠᠢ ᠪᠠᠶᠢᠬᠤ ᠠ᠋︖ ᠡᠶᠢᠮᠦ ᠠᠷᠢᠭᠤᠨ ᠨᠠᠨᠳᠢᠨ ᠢᠶᠠᠨ ᠡᠷᠭᠢᠮᠯᠡᠭᠦ ᠨᠢ ᠴᠦ ᠵᠥᠪ ᠪᠠᠶᠢᠯᠭᠦᠢ᠃ ᠥᠨᠳᠥᠷ ᠲᠤ ᠡᠷᠭᠦᠯ ᠦᠭᠡᠢ ᠴᠦ ᠶᠠᠭᠠᠬᠢᠬᠤᠪ︖ ᠠᠭᠠᠷ ᠲᠡᠭᠷᠢ᠂ ᠬᠥᠬᠡ ᠲᠡᠭᠷᠢ᠂ ᠮᠥᠩᠬᠡ ᠬᠥᠬᠡ ᠲᠡᠭᠷᠢ ᠁ ᠪᠢᠳᠡᠨ ᠤ ᠰᠢᠲᠦᠭᠡᠨ ᠲᠡᠶᠢᠮᠦ ᠯᠡ ᠠᠭᠤᠤ ᠭᠦᠨ ᠤᠳᠬ᠎ᠠ ᠲᠠᠢ ᠠᠵᠢ᠃ ᠪᠢᠳᠠᠨ ᠤ ᠰᠢᠲᠦᠭᠡᠨ᠂ ᠠᠭᠠᠷ ᠲᠡᠭᠷᠢ ᠮᠢᠨᠢ ᠠᠮᠢ ᠠᠮᠢᠰᠬᠤᠯ ᠪᠣᠯᠵᠤ ᠬᠤᠷᠣᠮ ᠪᠦᠷᠢ ᠵᠢᠷᠦᠬᠡᠨ ᠳᠤᠮᠳᠠᠭᠤᠷ ᠴᠣᠬᠢᠯᠠᠨ ᠪᠤᠢ᠃ ᠮᠥᠩᠬᠡ ᠬᠥᠬᠡ ᠲᠡᠭᠷᠢ ᠪᠠᠨ ᠠᠷᠭᠠᠳᠠᠨ ᠰᠢᠲᠦᠵᠦ᠂ ᠠᠪᠤᠷᠠᠯ ᠡᠷᠢᠬᠦ ᠶᠢᠨ ᠶᠣᠰᠣᠨ ᠴᠦ ᠠᠯᠤᠰ ᠬᠤᠯᠡ ᠠᠳᠠᠯ᠎ᠠ ᠣᠶᠢᠷ᠎ᠠ ᠵᠢᠷᠦᠬᠡᠨ ᠳᠤ ᠪᠤᠢ᠃ ᠪᠢᠳᠠ ᠶᠡᠭᠡ ᠠᠭᠤᠳᠠᠮ ᠢ ᠠᠷᠭᠠᠳᠠᠨ ᠲᠠᠭᠢᠵᠦ ᠪᠤᠢ᠂ ᠶᠡᠭᠡ ᠡᠭᠡᠯ ᠣᠶᠢᠷ᠎ᠠ ᠶᠢ ᠴᠦ ᠠᠷᠭᠠᠳᠠᠨ ᠲᠠᠭᠢᠵᠦ ᠪᠤᠢ᠃ ᠠᠷᠭᠠᠳᠠᠬᠤᠢ ᠭᠡᠳᠡᠭ ᠣᠷᠣᠰᠢᠨ ᠲᠣᠭᠲᠠᠨᠢᠬᠤ ᠶᠢᠨ ᠵᠥᠭᠡᠯᠡᠨ ᠠᠢ ᠶᠤᠮ᠃ ᠣᠷᠴᠢᠯᠠᠩ ᠬᠤᠷᠸ᠎ᠠ ᠶᠢᠨ ᠲᠦᠮᠡᠨ ᠪᠣᠳᠠᠰ ᠯᠤᠭ᠎ᠠ ᠡᠶ᠎ᠡ ᠵᠣᠬᠢᠴᠠᠯ ᠲᠠᠢ ᠣᠷᠣᠰᠢᠬᠤ ᠶᠢᠨ ᠭᠦᠨ ᠨᠠᠷᠢᠨ ᠤᠬᠠᠭᠠᠨ ᠪᠢᠯᠡ᠃ ᠠᠷᠭᠠᠳᠠᠶ᠎ᠠ ᠳ᠋ᠠ᠂ ᠬᠤᠷᠸ᠎ᠠ ᠳᠡᠯᠡᠬᠡᠢ᠂ ᠪᠠᠶᠢᠭᠠᠯᠢ ᠣᠷᠴᠢᠨ ᠢᠶᠠᠨ ᠬᠥᠮᠥᠰ ᠮᠢᠨᠢ︕     ︽ᠠᠭᠠᠷ᠎ᠠ ᠨᠢᠭᠡᠨ ᠪᠤᠢ︾᠃ ᠴᠣᠭᠲᠤ ᠬᠤᠩ ᠲᠠᠶᠢᠵᠢ ᠶᠢᠨ ᠬᠠᠳᠠᠨ ᠤ ᠪᠢᠴᠢᠭᠡᠰᠦ ᠳᠤ ᠡᠨᠡ ᠬᠦ ᠦᠭᠡ ᠲᠡᠮᠳᠡᠭᠯᠡᠭᠳᠡᠨ ᠴᠢ ᠪᠢᠳᠡᠨ ᠤ ᠦᠶ᠎ᠡ ᠳᠤ ᠬᠦᠷᠴᠦ ᠢᠷᠡᠨ᠂ ᠴᠢ ᠪᠢᠳᠡᠨ ᠤ ᠣᠶᠣᠨ ᠤᠬᠠᠭᠠᠨ ᠳᠤ ᠲᠣᠳᠣᠷᠠᠨ ᠪᠠᠶᠢᠬᠤ ᠨᠢ ᠴᠦ ᠶᠠᠭᠤᠲᠠᠢ ᠡᠷᠬᠢᠮ ᠠᠵᠢ᠃ ᠲᠡᠶᠢᠮᠦ ᠳ᠋ᠠ᠂ ᠠᠭᠠᠷ᠎ᠠ ᠨᠢᠭᠡᠨ ᠪᠢᠵᠡ ᠪᠢᠳᠠ ᠪᠦᠭᠦᠳᠡᠭᠡᠷ ᠢᠶᠠᠨ᠃ ᠲᠡᠭᠷᠢ ᠭᠠᠵᠠᠷ ᠯᠤᠭ᠎ᠠ ᠴᠦ ᠠᠭᠠᠷ᠎ᠠ ᠨᠢᠭᠡᠨ ᠪᠢᠵᠡ᠃ ᠮᠣᠩᠭᠤᠯᠴᠤᠳ ᠲᠡᠭᠷᠢ ᠯᠤᠤᠰ ᠢ ᠠᠷᠭᠠᠳᠠᠨ᠂ ᠲᠡᠭᠷᠢ ᠯᠤᠤᠰ ᠲᠠᠢ ᠪᠠᠨ ᠠᠭᠠᠷ ᠨᠢᠭᠡᠨ ᠤᠴᠢᠷ ᠶᠠᠷᠢᠵᠤ ᠬᠠᠷᠢᠴᠠᠵᠤ ᠴᠦ ᠢᠷᠡᠭᠰᠡᠨ ᠬᠥᠮᠥᠰ᠃ ᠲᠡᠶᠢᠮᠦ ᠶᠢᠨ ᠤᠴᠢᠷ ᠣᠪᠣᠭ᠎ᠠ ᠪᠤᠯᠠᠭ᠂ ᠨᠠᠭᠤᠷ ᠤᠰᠤ ᠪᠠᠨ ᠲᠠᠭᠢᠳᠠᠭ᠃ ᠠᠭᠠᠷ ᠲᠡᠭᠷᠢ ᠶᠢ ᠬᠠᠶᠢᠷᠠᠯᠠᠬᠤ ᠠᠴᠠ ᠳᠡᠭᠡᠳᠦᠯᠡᠨ ᠲᠠᠭᠢᠵᠦ ᠢᠷᠡᠭᠰᠡᠨ ᠬᠥᠮᠥᠰ ᠪᠢᠯᠡ᠃ ᠴᠠᠭᠠᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠡ ᠶᠢᠨ ᠨᠢᠭᠡᠨ ᠳᠤ ᠴᠠᠭᠠᠨ ᠢᠰᠡᠭᠡᠢ ᠪᠠᠨ ᠳᠡᠪᠢᠰᠦᠨ᠂ ᠴᠠᠭᠠᠨ ᠢᠳᠡᠭᠡ ᠪᠠᠨ ᠡᠷᠭᠦᠨ᠂ ᠲᠡᠭᠷᠢ ᠳᠤ ᠮᠥᠷᠭᠦᠨ ᠲᠡᠭᠰᠢ ᠵᠢᠷᠭᠠᠵᠤ ᠢᠷᠡᠭᠰᠡᠨ ᠬᠥᠮᠥᠰ ᠪᠢᠯᠡ᠃ ᠠᠭᠠᠷ ᠲᠡᠭᠷᠢ ᠶᠢ ᠰᠢᠲᠦᠬᠦ ᠶᠣᠰᠣᠨ ᠲᠡᠶᠢᠮᠦ ᠡᠷᠬᠢᠮ ᠠᠵᠢ᠃     ᠣᠳᠣ ᠬᠠᠷᠢᠨ ᠬᠥᠮᠥᠰ ᠨᠢᠳᠦᠨ ᠡᠮᠦᠨᠡᠬᠢ ᠠᠰᠢᠭ ᠵᠢᠷᠭᠠᠯ ᠳᠤ ᠰᠢᠨᠤᠨ᠂ ᠠᠭᠠᠷ ᠲᠡᠭᠷᠢ ᠶᠢ ᠠᠯᠢ ᠭᠠᠯᠪᠠ ᠳᠤ ᠮᠠᠷᠲᠠᠨ᠂ ᠪᠣᠬᠢᠷ ᠬᠡᠢ ᠣᠳᠤᠭ᠎ᠠ ᠶᠢ ᠲᠡᠭᠷᠢ ᠭᠠᠵᠠᠷ ᠲᠠᠢ ᠬᠤᠯᠪᠣᠨ ᠠᠶᠤᠬᠤ ᠬᠢᠴᠢᠶᠡᠬᠦ ᠶᠢ ᠮᠠᠷᠲᠠᠵᠠᠢ᠃ ᠠᠭᠠᠷ ᠨᠢᠭᠡᠨ ᠪᠤᠢ ᠨᠦᠭᠦᠭᠡ ᠪᠣᠬᠢᠷ ᠣᠳᠤᠭ᠎ᠠ ᠠᠮᠠᠨ ᠳᠤ ᠴᠢᠨᠢ ᠣᠷᠣᠨ᠂ ᠠᠶᠤᠤᠯᠢᠬᠠᠢ ᠳᠤ ᠴᠢᠨᠢ ᠬᠠᠷᠠᠯᠠᠬᠤ ᠵᠣᠪᠠᠯᠠᠩ ᠢᠷᠡᠨ᠎ᠡ᠃ ᠬᠢᠴᠢᠶᠡᠭᠲᠦᠨ᠂ ᠡᠨᠡ ᠴᠡᠯᠮᠡᠭ ᠠᠭᠠᠷ᠂ ᠴᠡᠩᠬᠡᠷ ᠲᠡᠭᠷᠢ ᠶᠢᠨ ᠳᠣᠣᠷ᠎ᠠ ᠪᠤᠶᠠᠨ ᠨᠢᠭᠦᠯ ᠢ ᠪᠤᠳᠣᠵᠦ ᠶᠠᠪᠤᠭᠠᠷᠠᠢ᠂ ᠲᠠ ᠨᠠᠷ ᠮᠢᠨᠢ︕     ᠠᠭᠤᠳᠠᠮ ᠣᠷᠴᠢᠯᠠᠩ ᠤᠨ ᠵᠠᠢ ᠠᠴᠠ ᠮᠠᠨ ᠤ ᠪᠥᠮᠪᠥᠷᠴᠡᠭ ᠴᠡᠩᠬᠡᠷ ᠬᠠᠷᠠᠭᠳᠠᠳᠠᠭ ᠭᠡᠰᠡᠨ᠃ ᠲᠡᠷᠡ ᠪᠣᠯ ᠣᠰᠣᠨ ᠴᠡᠩᠬᠡᠷ ᠪᠥᠮᠪᠥᠷᠴᠡᠭ᠂ ᠤᠰᠤ ᠠᠮᠢ ᠨᠠᠰᠤ ᠣᠷᠣᠰᠢᠬᠤ ᠶᠢᠨ ᠦᠨᠳᠦᠰᠦ ᠪᠦᠯᠦᠭᠡ᠃ ᠬᠥᠮᠥᠨ ᠤ ᠪᠡᠶ᠎ᠡ ᠶᠢᠨ ᠵᠠᠭᠤᠨ ᠤ ᠲᠡᠯᠠ ᠨᠢ ᠤᠰᠤ ᠭᠡᠳᠡᠭ᠃ ᠤᠰᠤ ᠦᠭᠡᠢ ᠪᠠᠷ ᠠᠮᠢ ᠨᠠᠰᠣᠨ ᠤ ᠣᠷᠣᠰᠢᠯ ᠲᠣᠭᠲᠠᠨᠢᠯ ᠢ ᠲᠥᠰᠥᠭᠡᠯᠡᠬᠦ ᠳᠤ ᠪᠡᠷᠬᠡ᠃ ᠲᠡᠶᠢᠮᠦ ᠶᠢᠨ ᠤᠴᠢᠷ ᠤᠬᠠᠭᠠᠨᠲᠤ ᠳᠡᠭᠡᠳᠦᠰ ᠮᠢᠨᠢ ᠤᠰᠤ ᠶᠢ ᠷᠠᠰᠢᠶᠠᠨ ᠬᠡᠮᠡᠨ ᠳᠡᠭᠡᠳᠦᠯᠡᠵᠦ ᠢᠷᠡᠵᠡᠢ᠃ ᠤᠰᠤ ᠯᠤᠤᠰ ᠨᠠᠢᠮᠠᠨ ᠠᠶᠢᠮᠠᠭ ᠢ ᠳᠡᠭᠡᠳᠦᠯᠡᠨ ᠲᠠᠭᠢᠵᠦ᠂ ᠠᠷᠭᠠᠳᠠᠨ ᠠᠮᠢᠳᠤᠷᠠᠵᠤ ᠢᠷᠡᠵᠡᠢ᠃ ︽ᠤᠤᠭᠤᠭᠰᠠᠨ ᠤᠰᠤ ᠷᠠᠰᠢᠶᠠᠨ᠂ ᠤᠨᠠᠭᠰᠠᠨ ᠰᠢᠷᠣᠢ ᠠᠯᠲᠠ︾ ︽ᠤᠰᠤ ᠶᠢ ᠨᠢ ᠤᠤᠭᠤᠪᠠᠯ ᠡᠬᠢ ᠶᠢ ᠨᠢ ᠪᠤᠳᠣ︾ ᠁ ᠬᠡᠮᠡᠨ ᠣᠰᠣᠨ ᠤ ᠲᠤᠬᠠᠢ ᠮᠠᠰᠢ ᠣᠯᠠᠨ ᠡᠷᠬᠢᠮ ᠠᠷᠢᠭᠤᠨ ᠰᠤᠷᠭᠠᠯ ᠢ ᠨᠣᠮᠯᠠᠵᠤ ᠢᠷᠡᠵᠡᠢ᠃ ᠡᠷᠳᠡᠮᠲᠡᠨ ᠰ᠊ · ᠲᠣᠯᠮ᠎ᠠ ᠶᠢᠨ ᠪᠦᠲᠦᠭᠡᠯ ᠳᠤ ︿ᠰᠣᠣ ᠵᠠᠯᠢ﹀ ᠭᠡᠳᠡᠭ ᠦᠭᠡ ᠶᠢ ᠰᠣᠣ ᠨᠢ ᠤᠰᠤ᠂ ᠵᠠᠯᠢ ᠨᠢ ᠭᠠᠯ ᠭᠡᠵᠦ ᠲᠠᠶᠢᠯᠪᠤᠷᠢᠯᠠᠭᠰᠠᠨ ᠪᠠᠶᠢᠳᠠᠭ᠃ ᠤᠰᠤ ᠲᠡᠶᠢᠮᠦ ᠬᠦᠴᠦᠲᠡᠢ ᠂ ᠰᠢᠳᠢ ᠲᠠᠢ ᠶᠢᠨ ᠤᠴᠢᠷ ᠪᠢᠯᠡ᠃ ︽ᠤᠰᠤ ᠶᠢ ᠨᠢ ᠤᠤᠭᠤᠪᠠᠯ ᠶᠣᠰᠣ ᠶᠢ ᠨᠢ ᠲᠠᠭ᠎ᠠ︾ ︽ᠬᠥᠮᠥᠨ ᠤ ᠳᠡᠭᠡᠳᠦ ᠨᠠᠭᠠᠴᠤ᠂ ᠣᠰᠣᠨ ᠤ ᠡᠬᠢ ᠪᠤᠯᠠᠭ︾ ᠭᠡᠵᠦ ᠴᠦ ᠬᠡᠯᠡᠳᠡᠭ᠃ ᠭᠤᠣᠯ ᠤᠰᠤ ᠪᠠᠷ ᠨᠢ ᠢᠯᠭᠠᠨ ᠨᠡᠷᠡᠯᠡᠵᠦ ᠴᠦ ᠪᠠᠶᠢᠳᠠᠭ᠃ ᠶᠡᠷᠦ ᠨᠢ ᠨᠤᠲᠤᠭ ᠤᠰᠤ ᠠ᠋ ᠭᠡᠵᠦ ᠨᠡᠷᠡᠯᠡᠨ ᠤᠴᠢᠷᠯᠠᠬᠤ ᠶᠢᠨ ᠶᠣᠰᠣᠨ ᠴᠦ ᠲᠡᠷᠡ ᠳ᠋ᠠ᠃ ᠡᠨᠡ ᠮᠡᠲᠦ ᠮᠠᠨ ᠤ ᠠᠷᠠᠳ ᠤᠨ ᠵᠠᠩ ᠵᠠᠩᠰᠢᠯ ᠳᠤ ᠣᠰᠣᠨ ᠤ ᠲᠤᠬᠠᠢ ᠦᠨᠡᠨ ᠤᠴᠢᠷᠯᠠᠯ ᠶᠡᠭᠡ ᠪᠤᠢ᠃ ᠴᠢᠨᠠᠭᠰᠢ ᠬᠤᠯᠪᠣᠨ ᠪᠤᠳᠣᠬᠤᠯᠠᠷ ᠪᠠᠷᠤᠭ ᠬᠥᠮᠥᠨ ᠪᠢᠳᠡ ᠣᠰᠣᠨ ᠤ ᠤᠴᠢᠷ᠂ ᠣᠰᠣᠨ ᠤ ᠭᠡᠯᠪᠡᠷᠢ᠂ ᠣᠰᠣᠨ ᠤ ᠬᠤᠪᠢᠷᠠᠯ ᠴᠦ ᠪᠣᠯᠵᠤ ᠪᠠᠶᠢᠨ᠎ᠠ᠃ ᠲᠡᠶᠢᠮᠦ ᠶᠢᠨ ᠤᠴᠢᠷ ᠣᠰᠣᠨ ᠤ ᠳᠡᠷᠭᠡᠳᠡ ᠡᠯᠳᠡᠪ ᠢ ᠥᠭᠦᠯᠡᠬᠦ ᠦᠭᠡᠢ᠂ ᠮᠠᠭᠤ ᠪᠤᠵᠠᠷ ᠢ ᠣᠰᠣᠨ ᠳᠤ ᠣᠷᠭᠢᠬᠤ ᠦᠭᠡᠢ ᠭᠡᠳ ᠶᠡᠭᠡ ᠣᠯᠠᠨ ᠴᠡᠭᠡᠷ ᠵᠢᠷᠤᠮ ᠢ ᠬᠡᠪᠰᠢᠭᠦᠯᠦᠨ ᠲᠠᠲᠠᠭᠤᠯᠵᠤ ᠢᠷᠡᠵᠡᠢ᠃ ᠲᠡᠭᠷᠢ ᠶᠢᠨ ᠬᠤᠷ᠎ᠠ ᠠᠴᠠ ᠳᠣᠰᠣᠯ ᠤᠰᠤ ᠭᠦᠷᠳᠡᠯ᠎ᠡ ᠳᠡᠭᠡᠳᠦᠯᠡᠨ ᠢᠷᠡᠭᠰᠡᠨ ᠤ ᠤᠴᠢᠷ ᠭᠤᠣᠯ ᠤᠰᠤ ᠮᠢᠨᠢ ᠠᠷᠢᠭᠤᠨ ᠲᠤᠩᠭᠠᠯᠠᠭ ᠢᠪᠢᠯᠵᠦ ᠯᠡ ᠪᠠᠶᠢᠳᠠᠭ᠃     ᠲᠤᠩᠭᠠᠯᠠᠭ ᠰᠠᠶᠢᠬᠠᠨ ᠤᠷᠤᠰᠬᠠᠯ ᠢ ᠬᠠᠷᠠᠭᠠᠳ ᠪᠠᠶᠠᠷᠯᠠᠬᠤ ᠦᠭᠡᠢ ᠬᠥᠮᠥᠨ ᠭᠡᠵᠦ ᠬᠤᠪᠣᠷ᠃ ᠴᠡᠯᠮᠡᠭ ᠬᠥᠬᠡ ᠠᠭᠠᠷ᠂ ᠴᠡᠩᠬᠡᠷ ᠲᠤᠩᠭᠠᠯᠠᠭ ᠤᠰᠤ ᠶᠢ ᠬᠠᠷᠠᠭᠠᠳ ᠪᠠᠶᠠᠰᠬᠤ ᠨᠢ ᠴᠢ ᠪᠢᠳᠠ ᠲᠡᠳᠡᠨ ᠤ ᠬᠡᠦᠬᠡᠳ᠂ ᠦᠷ᠎ᠡ ᠰᠠᠳᠤ ᠪᠣᠯᠣᠭᠠᠳ ᠲᠡᠷᠡ ᠤᠤ︖ ᠪᠤᠣ ᠮᠡᠳᠡ᠃ ᠡᠬᠡ ᠡᠴᠢᠭᠡ ᠪᠠᠨ ᠬᠠᠷᠠᠭᠰᠠᠨ ᠮᠡᠲᠦ ᠳᠣᠭᠳᠣᠯᠤᠨ ᠪᠠᠶᠢᠬᠤ ᠨᠢ ᠡᠴᠢᠨ᠎ᠡ ᠭᠦᠨ ᠤ ᠨᠠᠷᠢᠨ ᠬᠤᠯᠪᠣᠭᠠᠰᠤ ᠪᠠᠶᠢᠬᠤ ᠶᠢᠨ ᠤᠴᠢᠷ ᠪᠠᠶᠢᠬᠤ ᠠ᠋᠃ ᠣᠳᠣ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠢᠶᠠᠷ ᠤᠰᠤ ᠮᠡᠳᠡᠷᠡᠯ ᠲᠠᠢ ᠭᠡᠵᠦ ᠰᠤᠳᠤᠯᠤᠨ ᠭᠠᠷᠭᠠᠵᠠᠢ᠃ ᠶᠠᠫᠤᠨ ᠤ ᠡᠷᠳᠡᠮᠲᠡᠨ ᠴᠦ ᠣᠰᠣᠨ ᠳᠤ ᠰᠠᠶᠢᠨ᠂ ᠮᠠᠭᠤ ᠦᠭᠡ ᠬᠡᠯᠡᠨ ᠲᠤᠷᠰᠢᠯᠲᠠ ᠬᠢᠵᠦ ᠭᠠᠶᠢᠬᠠᠯᠲᠠᠢ ᠳ᠋ᠦᠩ ᠭᠠᠷᠭᠠᠭᠰᠠᠨ ᠶᠤᠮ ᠃ ᠲᠡᠷᠡ ᠮᠡᠳᠡᠷᠡᠯ ᠲᠠᠢ᠂ ᠮᠠᠨ ᠤ ᠡᠪᠦᠭᠡ ᠳᠡᠭᠡᠳᠦᠰ ᠠᠯᠢ ᠡᠷᠲᠡ ᠰᠡᠳᠬᠢᠯ ᠵᠢᠷᠦᠬᠡ ᠪᠠᠷ ᠢᠶᠠᠨ ᠮᠡᠳᠡᠷᠡᠭᠰᠡᠨ ᠁ ᠡᠬᠡ ᠶᠢᠨ ᠰᠦ ᠮᠡᠲᠦ ᠠᠷᠢᠭᠤᠨ ᠲᠤᠩᠭᠠᠯᠠᠭ ᠷᠠᠰᠢᠶᠠᠨ ᠤᠰᠤ ᠶᠢ ᠳᠡᠭᠡᠳᠦᠯᠡᠨ ᠲᠠᠭᠢᠬᠤ ᠶᠢᠨ ᠤᠴᠢᠷ ᠡᠶᠢᠮᠦ ᠠᠵᠢ᠃     ᠡᠴᠢᠭᠡ ᠡᠪᠦᠭᠡᠳ ᠤᠨ ᠮᠢᠨᠢ ᠶᠠᠰᠤ ᠪᠠᠨ ᠲᠠᠯᠪᠢᠭᠰᠠᠨ ᠡᠨᠡ ᠠᠯᠲᠠᠨ ᠰᠢᠷᠣᠢ᠂ ᠠᠷᠢᠭᠤᠨ ᠴᠢᠰᠤ ᠠᠯᠲᠠᠨ ᠠᠮᠢ ᠪᠠᠷ ᠢᠶᠠᠨ ᠬᠠᠶᠢᠷᠠᠯᠠᠨ ᠬᠠᠮᠠᠭᠠᠯᠠᠵᠤ ᠢᠷᠡᠭᠰᠡᠨ ᠡᠨᠡ ᠨᠤᠲᠤᠭ ᠭᠡᠭᠴᠢ ᠴᠢ ᠪᠢᠳᠠᠨ ᠲᠠᠢ ᠠᠮᠢ ᠪᠡᠶ᠎ᠡ ᠠᠷᠢᠭᠤᠨ ᠰᠦᠨᠡᠰᠦᠨ ᠤ ᠬᠤᠯᠪᠤᠭ᠎ᠠ ᠲᠠᠢ ᠪᠢᠯᠡ᠃ ᠪᠢᠳᠠ ᠶᠠᠭᠠᠬᠢᠬᠤ ᠳᠠᠭᠠᠨ ᠥᠭᠡᠷ᠎ᠡ ᠲᠢᠪ ᠲᠤ ᠲᠦᠷᠦᠭᠡ ᠦᠭᠡᠢ᠂ ᠥᠭᠡᠷ᠎ᠡ ᠣᠷᠣᠨ ᠢ ᠵᠣᠷᠢᠭ᠎ᠠ ᠦᠭᠡᠢ᠂ ᠥᠭᠡᠷ᠎ᠡ ᠨᠤᠲᠤᠭ ᠲᠤ ᠣᠴᠢᠭ᠎ᠠ ᠦᠭᠡᠢ᠂ ᠥᠭᠡᠷ᠎ᠡ ᠠᠭᠤᠯᠠ ᠣᠰᠣᠨ ᠳᠤ ᠬᠦᠷᠴᠦ ᠵᠠᠶᠠᠭᠠᠭ᠎ᠠ ᠦᠭᠡᠢ ᠪᠢᠯᠡ᠃ ᠨᠤᠲᠤᠭ ᠤᠰᠤ ᠪᠠᠨ ᠬᠠᠶᠢᠷᠠᠯᠠᠬᠤ ᠶᠢᠨ ᠶᠣᠰᠣᠨ ᠲᠡᠷᠡ᠂ ᠴᠠᠭᠠᠨ᠎ᠠ ᠠᠴᠠ ᠪᠠᠨ ᠭᠦᠢ ᠶᠢᠨ ᠬᠤᠯᠪᠤᠭ᠎ᠠ ᠲᠠᠢ ᠶᠢᠨ ᠤᠴᠢᠷ ᠴᠦ ᠲᠡᠷᠡ ᠳ᠋ᠠ᠃ ᠣᠪᠣᠭ᠎ᠠ ᠪᠣᠰᠬᠠᠨ ᠠᠭᠤᠯᠠ ᠬᠠᠶᠢᠷᠬᠠᠳ ᠢᠶᠠᠨ ᠲᠠᠭᠢᠨ ᠳᠡᠭᠡᠳᠦᠯᠡᠬᠦ ᠶᠢᠨ ᠤᠴᠢᠷ ᠴᠦ ᠲᠡᠶᠢᠮᠦ᠂ ᠠᠯᠳᠠᠩᠬᠠᠨ ᠭᠠᠵᠠᠷ ᠰᠢᠷᠣᠢ ᠮᠢᠨᠢ᠃ ᠭᠦᠯᠦᠭ ᠮᠣᠷᠢᠳ ᠨᠤᠲᠤᠭ ᠵᠦᠭ ᠢᠶᠠᠨ ᠭᠦᠶᠦᠳᠡᠭ ᠤᠨ ᠨᠢᠭᠤᠴᠠ ᠴᠦ ᠲᠡᠷᠡ᠃ ᠲᠡᠷᠡ ᠭᠠᠵᠠᠷ ᠰᠢᠷᠣᠢ᠂ ᠠᠭᠤᠤ ᠬᠥᠷᠥᠰᠥᠨ ᠳᠡᠭᠡᠷ᠎ᠡ ᠮᠥᠷ ᠢᠶᠠᠨ ᠲᠠᠮᠠᠭᠠᠯᠠᠨ ᠶᠠᠪᠤᠭᠰᠠᠨ ᠡᠪᠦᠭᠡᠳ ᠤᠨ ᠠᠷᠢᠭᠤᠨ ᠦᠢᠯᠡᠰ ᠶᠠᠭᠤᠲᠠᠢ ᠨᠠᠨᠳᠢᠨ᠂ ᠲᠡᠳᠡᠨ ᠤ ᠪᠦᠲᠦᠭᠡᠭᠰᠡᠨ ᠰᠣᠶᠣᠯ ᠲᠡᠦᠬᠡ ᠶᠠᠭᠤᠲᠠᠢ ᠡᠷᠬᠢᠮ᠃ ᠡᠨᠡ ᠠᠭᠤᠤ ᠡᠷᠬᠢᠮ ᠰᠣᠶᠣᠯ ᠲᠡᠦᠬᠡ ᠶᠢ ᠪᠦᠲᠦᠭᠡᠬᠦ ᠳᠤ ᠠᠯᠲᠠᠨ ᠬᠥᠷᠥᠰᠥᠨ ᠠᠴᠠ ᠤᠷᠭᠤᠭᠰᠠᠨ ᠠᠮᠤ ᠲᠠᠷᠢᠶ᠎ᠠ᠂ ᠡᠪᠡᠰᠦ ᠪᠡᠯᠴᠢᠭᠡᠷ ᠬᠥᠮᠥᠨ ᠪᠢᠳᠠᠨ ᠳᠤ ᠦᠶ᠎ᠡ ᠶᠢᠨ ᠦᠶ᠎ᠡ ᠳᠤ ᠰᠢᠮ᠎ᠡ ᠪᠠᠨ ᠥᠭᠴᠦ ᠥᠰᠬᠡᠨ ᠲᠣᠷᠨᠢᠭᠤᠯᠤᠨ ᠢᠷᠡᠵᠡᠢ᠃ ᠭᠠᠭᠴᠠ ᠨᠠᠪᠴᠢᠨ ᠤ ᠦᠨ᠎ᠡ ᠪᠢᠳᠠᠨ ᠳᠤ ᠪᠠᠶᠢᠳᠠᠭ ᠴᠦ ᠪᠣᠯᠪᠠᠤ︖ ᠬᠡᠮᠡᠨ ᠪᠤᠳᠣᠬᠤ ᠦᠶ᠎ᠡ ᠪᠤᠢ ᠰᠢᠦ᠃ ᠣᠩᠭᠤᠨ ᠲᠠᠬᠰᠢᠨ ᠥᠨᠳᠥᠷ ᠰᠦᠷᠯᠢᠭ ᠠᠭᠤᠯᠠ ᠬᠠᠶᠢᠷᠬᠠᠳ ᠮᠢᠨᠢ᠂ ᠡᠯᠢᠭᠡᠨ ᠳᠡᠭᠡᠨ ᠮᠠᠨ ᠢ ᠪᠦᠪᠠᠶᠢᠯᠡᠭᠰᠡᠨ ᠡᠴᠢᠭᠡ ᠡᠪᠦᠭᠡᠳ ᠮᠡᠲᠦ ᠬᠠᠨᠠᠷᠠᠨ ᠰᠡᠬᠦ᠋ᠢᠭᠰᠡᠨ ᠠᠭᠤᠯᠠᠰ ᠮᠢᠨᠢ᠂ ᠬᠠᠷᠠᠭ᠎ᠠ ᠠᠯᠳᠠᠨ ᠰᠤᠨᠢᠶᠠᠭᠰᠠᠨ ᠵᠡᠷᠭᠡᠯᠭᠡᠨᠲᠦ ᠲᠠᠯ᠎ᠠ ᠮᠢᠨᠢ᠂ ᠠᠭᠤᠳᠠᠮ ᠲᠡᠨᠢᠭᠡᠷ ᠵᠠᠩ ᠠᠷᠠᠨᠰᠢᠨ ᠤ ᠡᠬᠢ ᠮᠢᠨᠢ᠂ ᠠᠯᠳᠠᠨ ᠰᠢᠷᠭᠠᠯ ᠡᠯᠡᠰᠦ ᠮᠠᠩᠬ᠎ᠠ ᠮᠢᠨᠢ᠂ ᠠᠭᠤᠤ ᠶᠡᠭᠡ ᠲᠡᠰᠪᠦᠷᠢ ᠲᠡᠪᠴᠢᠶᠡᠷᠢ ᠶᠢᠨ ᠡᠭᠦᠰᠦᠯ ᠮᠢᠨᠢ︕     ᠠᠯᠲᠠᠨ ᠨᠠᠷᠠᠨ ᠤ ᠢᠯᠴᠢ ᠲᠤᠶᠠᠭᠠᠨ ᠳᠤ ᠠᠮᠢ ᠨᠠᠰᠤ ᠳᠤᠯᠠᠭᠠᠨ ᠪᠦᠯᠢᠶᠡᠨ ᠲᠣᠷᠨᠢᠵᠤ ᠢᠷᠠᠵᠠᠢ᠃ ᠲᠡᠷᠡ ᠪᠢᠳᠠᠨ ᠤ ᠬᠠᠯᠠᠭᠤᠨ ᠳᠤᠯᠠᠭᠠᠨ ᠤ ᠡᠬᠡ ᠶᠤᠮ᠃ ᠪᠢᠳᠠ ᠡᠴᠢᠭᠡ ᠡᠪᠦᠭᠡᠳ ᠤᠨ ᠤᠳᠤᠮ ᠤᠭᠰᠠᠭ᠎ᠠ ᠪᠠᠨ ᠭᠠᠯ ᠭᠤᠯᠣᠮᠲᠠ ᠭᠡᠳᠡᠭ᠃ ᠠᠷᠢᠭᠤᠨ ᠭᠠᠯ ᠢ ᠠᠪᠴᠢᠷᠠᠭᠰᠠᠨ ᠲᠡᠦᠬᠡ ᠮᠠᠨ ᠳᠤ ᠪᠤᠢ᠃ ᠭᠡᠷᠡᠯ ᠭᠡᠭᠡ ᠦᠭᠡᠢ ᠂ ᠬᠠᠯᠠᠭᠤᠨ ᠳᠤᠯᠠᠭᠠᠨ ᠦᠭᠡᠢ ᠪᠣᠯ ᠠᠮᠢ ᠨᠠᠰᠤ ᠦᠭᠡᠢ᠃ ᠨᠡᠬᠡᠨ ᠪᠤᠳᠣᠬᠤ ᠳᠤ ᠪᠢᠳᠠ ᠠᠯᠲᠠᠨ ᠨᠠᠷᠠᠨ ᠤ ᠬᠡᠦᠬᠡᠳ᠂ ᠠᠷᠢᠭᠤᠨ ᠭᠠᠯ ᠤᠨ ᠦᠷ᠎ᠡ ᠰᠠᠳᠤ ᠭᠡᠮᠡᠷ᠂ ᠨᠢᠳᠦᠨ ᠳᠡᠭᠡᠨ ᠭᠠᠯ ᠲᠠᠢ᠂ ᠨᠢᠭᠤᠷ ᠲᠠᠭᠠᠨ ᠴᠤᠭ ᠲᠠᠢ ᠬᠡᠦᠬᠡᠳ ᠮᠡᠨᠳᠦᠯᠡᠬᠦ ᠶᠢᠨ ᠤᠴᠢᠷ ᠴᠦ ᠲᠡᠷᠡ᠃ ᠠᠭᠠᠷ ᠨᠢᠭᠡᠨ ᠪᠢᠵᠡ ᠪᠢᠳᠠ᠃ ᠲᠡᠷᠡ ᠠᠭᠠᠷ ᠲᠤ ᠳᠦᠷᠡᠯᠵᠡᠨ ᠪᠤᠢ ᠭᠠᠯ ᠲᠠᠢ ᠴᠦ ᠠᠭᠠᠷ ᠨᠢᠭᠡᠨ ᠶᠤᠮ ᠪᠢᠳᠠ᠃ ᠭᠠᠯ ᠤᠨ ᠠᠮᠢ ᠪᠣᠯ ᠠᠭᠠᠷ ᠶᠤᠮ᠃ ᠲᠡᠷᠡ ᠪᠢᠳᠠᠨ ᠳᠤ ᠬᠠᠯᠠᠭᠤᠨ ᠳᠤᠯᠠᠭᠠᠨ᠂ ᠰᠠᠶᠢᠨ ᠰᠠᠶᠢᠬᠠᠨ ᠢ ᠬᠠᠶᠢᠷᠠᠯᠠᠨ ᠪᠤᠢ᠃ ᠲᠡᠶᠢᠮᠦ ᠶᠢᠨ ᠤᠴᠢᠷ ᠭᠠᠯ ᠳᠤ ᠡᠯᠳᠡᠪ ᠤᠨ ᠪᠣᠬᠢᠷ ᠮᠠᠭᠤ ᠶᠢ ᠰᠢᠲᠠᠭᠠᠨ᠂ ᠦᠨᠦᠷ ᠲᠠᠨᠣᠷ ᠭᠠᠷᠭᠠᠬᠤ ᠶᠢ ᠶᠡᠭᠡ ᠴᠡᠭᠡᠷᠯᠡᠳᠡᠭ᠃ ᠮᠠᠭᠤ ᠮᠠᠭᠤᠬᠠᠢ ᠶᠢ ᠴᠦ ᠭᠠᠯ ᠢᠶᠠᠷ ᠠᠷᠢᠭᠤᠯᠠᠨ ᠠᠷᠴᠢᠵᠤ᠂ ᠲᠣᠬᠰᠢᠨ ᠰᠢᠷᠦᠭᠦᠨ ᠢ ᠴᠦ ᠭᠠᠯ ᠢᠶᠠᠷ ᠳᠠᠷᠤᠵᠤ ᠪᠠᠶᠢᠭᠰᠠᠨ᠃ ᠬᠠᠷᠢᠨ ᠠᠩᠬᠢᠯᠤᠮ᠎ᠠ ᠬᠦᠵᠢ᠂ ᠠᠷᠴᠠ ᠪᠠᠨ ᠤᠭᠤᠭᠢᠭᠤᠯᠤᠨ ᠭᠠᠯ ᠢᠶᠠᠨ ᠠᠷᠭᠠᠳᠠᠨ ᠲᠠᠭᠢᠵᠦ ᠪᠠᠶᠢᠳᠠᠭ᠃     ᠨᠠᠷᠠ᠂ ᠤᠰᠤ᠂ ᠰᠢᠷᠣᠢ ᠶᠢᠨ ᠬᠦᠴᠦ ᠰᠢᠮ᠎ᠡ ᠪᠠᠷ ᠤᠷᠭᠤᠭᠰᠠᠨ ᠣᠢ ᠮᠣᠳᠣ ᠶᠢ ᠡᠷᠬᠢᠮᠯᠡᠨ ᠬᠠᠶᠢᠷᠠᠯᠠᠵᠤ ︽ᠣᠷᠭᠤᠭ᠎ᠠ ᠪᠠᠶᠢᠬᠤ ᠳᠠᠭᠠᠨ ᠤᠰᠤ ᠲᠠᠲᠠᠵᠤ᠂ ᠤᠷᠭ᠎ᠠ ᠪᠣᠯᠣᠭᠠᠳ ᠠᠳᠤᠭᠤ ᠲᠠᠲᠠᠵᠤ︾ ᠬᠡᠮᠡᠨ ᠢᠷᠦᠭᠡᠯ ᠳᠡᠭᠡᠨ ᠴᠦ ᠰᠢᠭᠢᠳᠬᠡᠵᠦ᠂ ᠠᠪᠤᠷᠭᠤ ᠱᠠᠩᠰᠢ ᠮᠣᠳᠣ ᠶᠢ ᠴᠢᠮᠡᠭᠯᠡᠨ ᠲᠠᠭᠢᠳᠠᠭ ᠵᠠᠩ ᠦᠢᠯᠨ ᠲᠦᠭᠡᠮᠡᠯ ᠪᠠᠶᠢᠳᠠᠭ᠃ ᠪᠢᠳᠠ ᠣᠢ ᠮᠣᠳᠣ ᠲᠠᠢ ᠳᠦᠷᠦᠯ ᠶᠤᠮ᠃ ᠲᠡᠳᠡ ᠪᠢᠳᠡᠨ ᠳᠤ ᠬᠠᠨ᠎ᠠ ᠣᠨᠢ ᠪᠣᠯᠣᠨ ᠭᠡᠷ ᠦᠷᠦᠭᠡ ᠪᠣᠯᠵᠤ᠂ ᠬᠠᠰᠠᠭ ᠲᠡᠷᠭᠡ ᠪᠣᠯᠣᠨ ᠬᠤᠯᠡ ᠠᠶᠠᠯᠠᠵᠤ᠂ ᠦᠷ᠎ᠡ ᠵᠢᠮᠢᠰ ᠢᠶᠠᠷ ᠢᠶᠠᠨ ᠪᠢᠳᠠᠨ ᠢ ᠲᠡᠵᠢᠭᠡᠵᠦ᠂ ᠥᠯᠥᠭᠡᠢ ᠠᠪᠰᠠ ᠪᠣᠯᠣᠨ ᠪᠢᠳᠠᠨ ᠢ ᠪᠥᠭᠡᠴᠡᠶᠢᠯᠡᠳᠡᠭ᠃ ᠮᠣᠳᠣ ᠬᠥᠮᠥᠨ ᠤ ᠤᠴᠠᠷᠠᠯ ᠢ ᠶᠠᠷᠢᠵᠤ ᠪᠠᠷᠠᠬᠤ ᠪᠢᠰᠢ᠂ ᠮᠣᠳᠣ ᠪᠢᠳᠠᠨ ᠤ ᠦᠯᠢᠭᠡᠷ ᠢ ᠴᠦ ᠬᠡᠯᠡᠵᠦ ᠪᠠᠷᠠᠬᠤ ᠪᠢᠰᠢ ᠳ᠋ᠠ᠃ ᠣᠢ ᠮᠣᠳᠣ ᠶᠢ ᠠᠷᠭᠠᠳᠠᠨ ᠲᠠᠭᠢᠵᠦ ᠢᠷᠡᠭᠰᠡᠨ᠂ ᠠᠮᠢ ᠭᠤᠣᠯ ᠢᠶᠠᠨ ᠵᠠᠯᠭᠠᠵᠤ ᠢᠷᠡᠭᠰᠡᠨ ᠬᠥᠮᠥᠰ ᠪᠣᠯ ᠪᠢᠳᠠ ᠨᠠᠷ ᠶᠤᠮ᠃     ᠳᠣᠮᠣᠭᠲᠤ ᠬᠠᠳᠠ ᠶᠢ ᠰᠢᠲᠦᠵᠦ ᠢᠷᠠᠵᠠᠢ ᠪᠢᠳᠠ᠃ ᠡᠬᠡ ᠶᠢᠨ ᠠᠯᠳᠠᠨ ᠤᠮᠠᠢ᠂ ᠰᠢᠷᠭᠤᠭᠤᠯ ᠬᠠᠳᠠ᠂ ᠡᠵᠢ ᠴᠢᠯᠠᠭᠤ᠂ ᠪᠤᠷᠬᠠᠨ ᠬᠠᠳᠠ᠂ ᠪᠦᠭᠡ ᠶᠢᠨ ᠴᠢᠯᠠᠭᠤ᠂ ᠵᠠᠳ ᠤᠨ ᠴᠢᠯᠠᠭᠤ ᠁ ᠬᠠᠳᠠ ᠴᠢᠯᠠᠭᠤ ᠶᠢ ᠲᠠᠭᠢᠵᠦ ᠳᠡᠭᠡᠳᠦᠯᠡᠳᠡᠭ ᠶᠣᠰᠣᠨ ᠲᠦᠭᠡᠮᠡᠯ ᠪᠠᠶᠢᠳᠠᠭ᠃ ᠣᠪᠣᠭᠠᠨ ᠳᠤ ᠴᠢᠯᠠᠭᠤ ᠨᠡᠮᠡᠳᠡᠭ᠃ ᠴᠢᠯᠠᠭᠤ ᠮᠠᠨ ᠳᠤ ᠬᠥᠭᠵᠢᠯ ᠲᠠᠪᠰᠢᠯ ᠥᠭᠭᠦᠭᠰᠡᠨ᠂ ᠴᠢᠯᠠᠭᠤᠨ ᠠᠴᠠ ᠪᠢᠳᠠ ᠲᠡᠮᠦᠷ ᠭᠠᠷᠭᠠᠭᠰᠠᠨ᠂ ᠬᠦᠷᠡᠯ ᠭᠠᠷᠭᠠᠭᠰᠠᠨ᠂ ᠰᠢᠯ ᠪᠣᠯᠣᠷ ᠭᠠᠷᠭᠠᠭᠰᠠᠨ ᠁ ᠬᠠᠳᠠᠨ ᠪᠠᠭᠠᠲᠤᠷ᠂ ᠬᠠᠲᠠᠭᠤ ᠵᠣᠷᠢᠭ ᠢ ᠴᠦ ᠭᠠᠷᠭᠠᠭᠰᠠᠨ᠃     ᠪᠠᠶᠢᠭᠠᠯᠢ ᠣᠷᠴᠢᠨ ᠪᠢᠳᠡᠨ ᠤ ᠡᠬᠡ ᠶᠤᠮ᠃ ᠡᠵᠢ ᠪᠠᠨ ᠬᠠᠶᠢᠷᠠᠯᠠᠬᠤ ᠦᠭᠡᠢ ᠬᠥᠮᠥᠨ ᠭᠡᠵᠦ ᠦᠭᠡᠢ ᠪᠠᠶᠢᠬ᠎ᠠ᠃ ᠬᠥᠮᠥᠨ ᠲᠥᠷᠥᠯᠬᠢᠲᠡᠨ ᠮᠢᠨᠢ᠂ ᠲᠡᠭᠦᠨ ᠳᠡᠭᠡᠷ᠎ᠡ ᠬᠠᠮᠲᠤ ᠣᠷᠣᠰᠢᠨ ᠪᠠᠶᠢᠭ᠎ᠠ ᠠᠬᠠᠨ ᠳᠡᠭᠦᠦᠰ ᠠᠮᠢᠲᠠᠨ ᠤᠷᠭᠤᠮᠠᠯ ᠢ ᠬᠠᠶᠢᠷᠠᠯᠠᠭᠲᠤᠨ︕ ᠣᠳᠣ ᠶᠢᠨ ᠪᠢᠳᠠ ᠨᠠᠷ ᠲᠤ ᠨᠡᠶᠢᠲᠡᠯᠢᠭ ᠨᠢᠭᠡᠨ ᠭᠡᠮ ᠪᠤᠢ᠃ ᠲᠡᠷᠡ ᠨᠢ ᠳᠡᠩᠳᠡᠭᠦᠦ ᠠᠮᠢᠨᠴᠢᠷ᠂ ᠶᠠᠭᠤᠮ᠎ᠠ ᠪᠦᠭᠦᠨ ᠢ ᠥᠪᠡᠷ ᠢᠶᠠᠷ ᠢᠶᠠᠨ ᠲᠥᠪ ᠪᠤᠯᠭᠠᠬᠤ ︽ᠪᠢ︾ ᠬᠡᠮᠡᠬᠦ ᠦᠵᠡᠯ ᠶᠤᠮ᠃ ᠲᠡᠭᠦᠨ ᠤ ᠬᠤᠣᠷ ᠢᠶᠠᠷ ᠥᠪᠡᠷ ᠤᠨ ᠢᠶᠠᠨ ᠲᠥᠯᠥᠭᠡ ᠶᠠᠮᠠᠷ ᠮᠠᠭᠤ ᠮᠠᠭᠤᠬᠠᠢ ᠶᠢ ᠴᠦ ᠬᠢᠵᠦ᠂ ᠣᠷᠴᠢᠯᠠᠩ ᠳᠡᠯᠡᠬᠡᠢ ᠶᠢ ᠴᠦ ᠮᠠᠷᠲᠠᠨ ᠤᠮᠠᠷᠲᠠᠭᠰᠠᠨ ᠪᠠᠶᠢᠳᠠᠭ᠃ ᠬᠥᠮᠥᠰ ᠮᠢᠨᠢ ᠪᠢᠳᠡ ᠵᠢᠵᠢᠭᠬᠡᠨ ᠰᠢᠦ᠂ ᠥᠪᠡᠷ ᠠᠴᠠ ᠪᠠᠨ ᠭᠠᠳᠠᠭᠰᠢ ᠥᠷᠭᠡᠨ ᠳᠡᠯᠡᠬᠡᠢ ᠶᠢ ᠬᠠᠷᠠᠭᠠᠷᠠᠢ᠂ ᠬᠠᠶᠢᠷᠠᠯᠠᠭᠠᠷᠠᠢ︕ ᠪᠠᠳᠮᠠᠯᠠᠭᠰᠠᠨ ᠵᠤᠯᠠ ᠶᠢ ᠬᠠᠷᠠᠨ ᠭᠦᠨ ᠪᠢᠰᠢᠷᠡᠭᠡᠴᠢ᠂ ᠲᠡᠷᠡ᠂ ᠭᠡᠷᠡᠯ ᠭᠡᠭᠡᠨ ᠤ ᠲᠥᠯᠥᠭᠡ ᠠᠰᠠᠨ ᠪᠤᠢ᠃ ᠥᠨᠥᠴᠢᠨ ᠭᠠᠭᠴᠠ ᠴᠦᠳᠡᠩ ᠤᠨ ᠭᠡᠷᠡᠯ ᠢ ᠴᠦ ᠬᠠᠶᠢᠷᠠᠯᠠᠭᠠᠴᠢ᠂ ᠲᠡᠷᠡ ᠬᠠᠯᠠᠭᠤᠨ ᠳᠤᠯᠠᠭᠠᠨ ᠤ ᠡᠬᠢ᠃ ᠲᠣᠰᠣᠯ ᠣᠰᠣᠨ ᠠᠴᠠ ᠠᠳᠢᠰ ᠠᠪᠤᠭᠠᠴᠢ᠂ ᠦᠬᠦᠨ ᠬᠠᠲᠠᠨ ᠪᠠᠶᠢᠬᠤ ᠦᠶ᠎ᠡ ᠶᠢᠨ ᠠᠮᠠᠨ ᠳᠤ ᠬᠤᠷᠠᠭᠰᠠᠨ ᠰᠢᠯᠦᠰᠦᠨ ᠤ ᠪᠠᠨ ᠡᠬᠢ ᠶᠢ ᠪᠤᠳᠣᠭᠠᠴᠢ᠂ ᠵᠣᠪᠠᠯᠠᠩ ᠤᠨ ᠲᠠᠯᠠᠢ ᠳᠤ ᠲᠡᠯᠴᠢᠯᠡᠬᠦ ᠳᠡᠭᠡᠨ ᠲᠣᠰᠣᠯ ᠨᠢᠯᠪᠤᠰᠤᠨ ᠤ ᠦᠨ᠎ᠡ ᠶᠢ ᠰᠡᠳᠬᠢᠭᠡᠴᠢ᠂ ᠲᠡᠷᠡ ᠲᠣᠰᠣᠯ ᠨᠢᠯᠪᠤᠰᠤ ᠶᠠᠭᠠᠬᠢᠬᠤ ᠳᠠᠭᠠᠨ ᠴᠢᠮ᠎ᠠ ᠠᠴᠠ ᠲᠠᠰᠣᠷᠠᠨ ᠪᠠᠶᠢᠬᠤ ᠪᠤᠢ︖ ᠰᠢᠷᠬᠡᠭ ᠰᠢᠷᠣᠢ ᠶᠢ ᠡᠷᠬᠢᠮᠯᠡ᠂ ᠥᠷᠯᠥᠭᠡ ᠠᠯᠬᠤᠬᠤ ᠳᠠᠭᠠᠨ ᠥᠯᠮᠡᠢ ᠳᠣᠣᠷᠠᠬᠢ ᠭᠠᠵᠠᠷ ᠢᠶᠠᠨ ᠳᠡᠭᠡᠳᠦᠯᠡ᠃ ᠭᠠᠭᠴᠠ ᠨᠠᠪᠴᠢ ᠶᠢ ᠨᠠᠨᠳᠢᠩᠨᠠ᠂ ᠨᠢᠯᠬ᠎ᠠ ᠬᠡᠦᠬᠡᠳ ᠤᠨ ᠭᠠᠷ ᠮᠡᠲᠦ ᠳᠠᠩᠳᠠ ᠳᠠᠯᠠᠯᠤᠨ ᠪᠠᠶᠢᠳᠠᠭ ᠲᠡᠷᠡ ᠨᠠᠪᠴᠢ ᠲᠠᠢ ᠮᠡᠨᠳᠦᠯᠡᠭᠡᠷᠡᠢ᠃ ᠬᠡᠰᠡᠭ ᠴᠢᠯᠠᠭᠤᠨ ᠳᠤ ᠬᠦᠨᠳᠦᠳᠬᠡᠯ ᠦᠵᠡᠭᠦᠯ᠂ ᠲᠡᠷᠡ ᠡᠬᠡ ᠣᠷᠣᠨ ᠤ ᠴᠢᠨᠢ ᠬᠡᠰᠡᠭ ᠭᠡᠳᠡᠭ ᠢ ᠪᠢᠲᠡᠭᠡᠢ ᠮᠠᠷᠲᠠ᠃ ᠪᠢᠳᠡ ᠬᠡᠨ ᠭᠡᠳᠡᠭ ᠢᠶᠠᠨ ᠲᠡᠳᠡᠨ ᠤ ᠡᠮᠦᠨ᠎ᠡ ᠪᠤᠳᠣᠭᠠᠷᠠᠢ᠂ ᠪᠦᠭᠦᠨ ᠢ ᠠᠷᠭᠠᠳᠠᠭᠠᠴᠢ︕     ᠠᠷᠭᠠᠳᠠᠬᠤ ᠪᠣᠯ ᠡᠬᠡ ᠶᠢᠨ ᠬᠠᠶᠢᠷ᠎ᠠ ᠠᠴᠠ ᠡᠬᠢ ᠲᠠᠢ ᠬᠠᠶᠢᠷ᠎ᠠ ᠶᠤᠮ᠃ ᠠᠷᠭᠠᠳᠠᠬᠤ ᠪᠣᠯ ᠵᠥᠭᠡᠯᠡᠨ ᠠᠢ ᠶᠤᠮ᠃ ᠡᠨᠡ ᠣᠷᠴᠢᠯᠠᠩ ᠬᠠᠶᠢᠷ᠎ᠠ ᠶᠢᠨ ᠣᠷᠴᠢᠯᠠᠩ ᠪᠤᠯᠬᠤ ᠠᠴᠠ ᠪᠢᠰᠢ᠂ ᠬᠠᠷᠭᠢᠰ ᠤᠨ ᠣᠷᠴᠢᠯᠠᠩ ᠪᠢᠰᠢ᠃ ᠡᠪᠦᠭᠡ ᠳᠡᠭᠡᠳᠦᠰ ᠤᠨ ᠪᠦᠲᠦᠭᠡᠭᠰᠡᠨ ᠠᠷᠭᠠᠳᠠᠯ ᠰᠢᠭ᠋ ᠰᠠᠶᠢᠨ ᠰᠠᠶᠢᠬᠠᠨ ᠰᠤᠷᠲᠠᠯ ᠬᠠᠮᠢᠭ᠎ᠠ ᠪᠠᠶᠢᠨ᠎ᠠ᠃ ᠪᠢᠳᠡ ᠬᠠᠮᠲᠤ ᠶᠢᠨ ᠴᠣᠭᠴᠠ ᠶᠤᠮ᠃ ᠬᠠᠮᠲᠤ ᠶᠢᠨ ᠴᠣᠭᠴᠠ ᠶᠢ ᠡᠶ᠎ᠡ ᠵᠣᠬᠢᠴᠠᠯ ᠲᠠᠢ ᠪᠠᠶᠢᠯᠭᠠᠬᠤ ᠶᠢᠨ ᠦᠨᠳᠦᠰᠦ ᠨᠢ ᠠᠷᠭᠠᠳᠠᠯ᠃ ᠠᠷᠭᠠᠳᠠᠯ ᠪᠣᠯ ᠵᠥᠭᠡᠯᠡᠨ ᠬᠠᠨᠳᠤᠯᠭ᠎ᠠ᠃ ᠡᠨᠡ ᠪᠣᠯ ᠥᠨᠢ ᠤᠳᠠᠭᠠᠨ ᠣᠷᠣᠰᠢᠨ ᠲᠣᠭᠲᠠᠨᠢᠬᠤ ᠶᠢᠨ ᠦᠨᠡᠨ ᠵᠥᠪ᠂ ᠬᠠᠲᠠᠭᠤ ᠶᠣᠰᠣ᠃     ᠨᠠᠷᠠ ᠶᠢ ᠠᠷᠭᠠᠳᠠᠨ᠂ ᠤᠰᠤ ᠶᠢ ᠠᠷᠭᠠᠳᠠᠨ᠂ ᠠᠭᠤᠯᠠ ᠶᠢ ᠠᠷᠭᠠᠳᠠᠨ᠂ ᠨᠤᠲᠤᠭ ᠢᠶᠠᠨ ᠠᠷᠭᠠᠳᠠᠨ᠂ ᠳᠡᠯᠡᠬᠡᠢ ᠶᠢ ᠠᠷᠭᠠᠳᠠᠶ᠎ᠠ᠂ ᠡᠷᠬᠢᠮ ᠬᠥᠮᠥᠨ ᠲᠥᠷᠥᠯᠬᠢᠲᠡᠨ ᠮᠢᠨᠢ︕
ᠢᠷᠡᠯᠲᠡ᠄ ᠳᠤᠮᠳᠠᠳᠤ ᠤᠯᠤᠰ ᠤᠨ ᠮᠤᠩᠭᠤᠯ ᠬᠡᠯᠡᠨ ᠤ ᠰᠣᠨᠢᠨ ᠮᠡᠳᠡᠭᠡ ᠶᠢᠨ ᠰᠦᠯᠵᠢᠶ᠎ᠡ